Manipur-a Zo hnahthlakte leh Meitei inepnaah Zo hnahthlak lam mi 122-in nunna an chan tawh nia ngaih a ni a, an zinga a zatve dawn chu tunge an nih hriat a la ni lo.Tun buainaina a hrinchhuah, Manipur-a Zo hnahthlakte inzawmkhawmna, Indegenous Tribal Leaders Forum-in an chhut danin, Thawhtanni chhun thleng khan Zo hnahthlak mi 122-in nunna an chan tawh a, an zinga mi 70 chu tunge an nih hriat an ni tawh.
Nunna chante hi chi leh chi an inkah vanga nunna chan an ni vek lo a, inkahna hmun ni lova mipuiin an khawih leh sawisak te pawh an awm tih thu dawn a ni. Chutianga nunna chanah chuan hmeichhia pawh an awm tih thu dawn a ni bawk.
Manipur-a Zo hnahthlakte hian mahni khua leh ram an veng a, anmahni hnaihchilha beitu Meitei nen an inbei thin. Zo hnahthlakte chuan a bei hmasatu an ni ngai lo a, anmahni beitute lakah an lo inveng thin tih an sawi.
Tun hnaiah Sugnu khua leh a chhehvelah an inep na khawp mai a, May thla tawp atang khan chi leh chi hi inepin, silaiin an inkap thin. Chawlhni pawh khan Serou khuaah an inkap leh a, Zo hnahthlak lamah mi pathumin hliam an tuar a, nunna chan an awm lo tih thu dawn a ni.
An inep nasatna Sugnu leh a chhehvelah hi chuan khawtlangin eirawng an bawl a, tlawmngaia ‘duty’-te hi chaw leh an mamawh dangte an pe thin. An inep nat avangin mahni ina hawa chaw ei theiin an awm lo tih thu dawn a ni.
Hmun dang atang pawhin Sugnu leh a chhehvela mite hi Zo hnahthlakte’n an pui a, Chawlhni pawh khan Tuibuang vela thalaite’n eitur pein tawngtaina hun te an hmang a ni.
“Zo hnahthlakte kan inlungrual a, chi peng hrang hrangte kan duty-ho a. Zan reiah chuan khua a vawt deuh a, bunker-ah chi peng hrangte puan inzawnin an ‘duty’ a, insuihkhawmna lam veite tan chuan rilru hneh tak tak hmuh tur a awm thin,” tiin Sugnu vela an hruaitu pakhat chuan The Aizawl Post a hrilh.
Zo hnahthlak mi 120 velin nunna chan tawh
