Hun engemaw chen an boruak a dai a, tunah chuan a lum a ni mai lo, a satin a sa a ni ber a, Manipur-a Zo hnahthlakte leh Meitei an inkap leh mek.
Thawhlehni thleng khan Saikul velah Zo hnahthlakte leh Meitei an inkap leh a, nikum lama nasa taka an inkap ang khan ni li chhung an inkap.
Manipur atanga thu dawn danin, Saikul inkahnaah hian Zo hnahthlak lamah pakhat a thi a, hliam tuar pahnih an awm. Meitei lamah mi pali an thi.
Nilaini khan Sugnu-ah nasa takin an inkap bawk a, thi leh hliam zat hriat a ni rih lo.
Ningani zan khan Lamka-ah venhim hnathawkte’n mipui pungkhawm lam hawiin silai an hmet puak a, mi 40 chuangin hliam an tuar.
Tun hnaiah police SI pakhatin Zo hnahthlak volunteer-te thla a lakpui a, hei hi social media-a darh hnuah Lamka-ah hian boruak a lum ta a ni.
Lamka atanga thu dawn danin, he SI hi police-in an suspend a, Meitei lamah venhim hnathawkte’n Meitei ralthuam lek pawlte thlalak hmuh tur a tam chunga an suspend loh laia he SI suspend a ni hi Zo hnahthlak thalaite’n an hrethiam lo a, an boruak a lum zui ta a ni.
Ningani zan khan tuna an buainaa nunna chante hriatrengna hmun atana an siam ‘wall of remembrance’-ah thalai an pungkhawm a, a bul chiah hi mini secretariat niin, bawhrsap office pawh a awm. Bawrhsap office-ah hian bawrhsap leh SP an awm dun a, a kawta thalai pungkhawmte nena an boruak chu a alh ta a ni.
Thu dawn danin, venhim hnathawkte’n mipui lam hawiin silai an hmet puak a, mi pahnihin nunna an chan.
New secretariat kawt velah hian tun tum buainaa venhim hnathawkte hman tur lirthei engemaw zat a awm a, thalaite chuan hei hi an tihchhiat bakah new secretariat pawh an bei tih thu dawn a ni.
Zirtawpni lamah chuan Lamka hi an boruak a dai a, sorkarin dawr hawn leh lirthei tlan chhuah a khap bawk.
Zo hnahthlakte leh Meitei kar a sa leh
