Zo hnahthlakte leh Meitei la inkap Amit Shah-a’n Peace Committee din dawn

Manipur-ah Zo hnahthlakte leh Meitei an la inep a, silai pawh a la puak. Ningani kha chuan silai hi a hma angin a puak nasa lo a, mahse a la puak tho tih thu dawn a ni.Buaina a chhuah avanga Manipur-a zin India ram home minister Amit Shah-a’n Peace Committee din a nih tur thu a sawi a, Manipur larsap kaihhruaiin din a ni ang a, buaina chhuah chhan chhui a nih tur thu leh case paruk chu CBI-in an chhui tur thu te a sawi.
Ni thum chama zin Amit Shah hian inkah hai puan a nih tur thu a sawi a, ralthuam dah turin mi tin a ngen. He buainaa nunna changte ralna cheng nuai 10 zel pek a nih tur thu a sawi.
Ningani khan Amit Shah hian Imphal-ah thuthar lakhawmtute a kawm a, chu zawhah Delhi panin a haw a ni.
Manipur atanga thu dawn danin, hnam pahnihte hi an la inep a, an inep nasatna Sugnu khua leh a chhehvelah pawh silai a la puak.
Sugnu velah hian Inrinni atang khan an inep a, an inkap nasa hle. Sugnu hi Meitei khua a ni a, Zo hnahthlak pawh an awm. A chhehvelah Zo hnahthlakte’n an hual mek.
Thawhtanni khan Sugnu khuaa Zo hnahthlakte veng Langching venga mite an tlanchhuak emaw tiin an inte hal tumin Meitei-in an pan a, Zo hnahthlakte hi an lo tlanchhuak lo a, an in hal tumtute chu an lo kap a, Meitei lamah nunna chan an awm nual. Sipai lam chuan mi 51 an thi tiin an sawi. A hma ni-ah nasa takin an inkap a, a bet zawka tang Meitei mi 40 velin nunna an chan nia sawi a ni.
Sugnu hi Zo hnahthlakte’n an hual a, Meitei lamin Sugnu khua chu chhan an tum ve thung. Chutiang chuan an inep a, Zo hnahthlak lamah mi pathum pali velin nunna an chan nia hriat a ni.
Kangvai lamah pawh an la inep a, mahse inkah tak tak chu a awm lo; ‘Silai chu a puak a, mahse inkap han tih tur chu a ni lo,’ thudawnna chuan a ti.
Kangvai lamah hian Nilaini zan khan Meitei-in Zo hnahthlakte duty light an kap chhia a, chumi hnuah an inkap leh deuh. Nunna chan leh hliam tuar an awm lo tih thu dawn a ni.