Sumdawnna leh eizawnna thilah chauh a ni lo; Zokhawthar leh a chhehvel khuate leh an thenawm Myanmar lama Khawmawi leh a chhehvelte hi hnam khat an ni mai lo a, an inchhung kual them; hei vang hian inkalpawh an ngai a, chhungkaw thil vang pawhin intlawhpawh reng an ngai.
“Inkalpawh hi kan mamawh a, kei ngei pawhin helamah aiin Mizoramah chhungte ka ngah zawk a. Kan chhungte hi an rawn zin a ngai fo a, keini lam kan zin a ngai fo bawk a. Kawng hi an khar a nih chuan chhungkua kan buai ang, chutiang chu kan ni deuh vek ang,” Khawmawi pa pakhat chuan a ti.
“Mizoram hi kan sumdawnna hmun in ni ringawt lo a, kan inpui in ni. Keini lam atangin bungrua la thei lo ta ula, vai in mamawh ang a, chu chu kan khawngaih che u. Kan insumdawn tawn theih loh chuan vai nen chauh in insumdawn tawn ang a, vai hnuaiah in awm ang tih hi kan hlau,” Khawmawia dawrkai pakhat chuan a ti.
Khawmawi leh a chhehvel khuate hian Hualngoram an inti a, India sorkarin Mizoram leh Myanmar inkalpawh theih loh nana border fencing tih a tum hi an duh lo hle.
“Mipui zaa za hian border fencing hi kan duh lo ang, kan unaute nena inkalpawh theih loh hi kan duh lo a ni,” tiin Hualngoram hotu pakhat chuan a ti.
“India hian border fencing hi ti ta se, |iau atanga metre 150 velah a hung ang a, chuti a nih chuan keini lamin |iau hi kan ta neih dawn a, leilet kan nei thei ang a, balu pawh keimahni chauhvin kan la thei ang. Border fencing hi ti ta se, keini chuan kan hlawkpuina tur a awm a nih chu. Chuti chung chuan kan duh lo a, Mizorama kan unaute nena inkalpawh theih loh hi kan duh lo. Inkalpawh hi kan mamawh a, Mizoram pawhin a mamawh,” a ti bawk.
“Inkalpawh thei lo ta ila, kan inunauna hi a nghawng ang tih pawh a hlauhawm. Tunah hian Myanmar ram a lo zalen deuh hnuah kan inkalpawh theih avanga unau kan ni tih kan hriat tharzia hi hai rual a ni lo a, keini lam leh Mizoram lamin unau kan ni tih kan hre thar a nih hi,” a ti bawk.
“Vaiho hian min khawngaih lo. Kan inkalpawh theih loh avanga kan tuar dan tur hi an hre duh lo. Tuna rei lo te kan inkalpawh theih loh pawhin a lehlam lehlamin kan tuar a, border fencing an tih phei chuan kan tuar nasa ang,” Pi Biaki, Khawmawi khuaa cheng pawhin a ti.
Zo hnahthlakte’n border fencing duh lo
