Zo hnahthlakte’n UT ngiat thu pass
Nilaini khan Lamka-ah Manipur-a Zo hnahthlakte intelkhawmna Kuki-Zo Council (KZC) hnuaia Indigenous Tribal Leaders’ Forum (ITLF) huaihawtin mipuiin kawng an zawh a, Zo hnahthlakte tana UT an ngiat thu an pass.
2023 May thla atangin Manipur-ah Zo hnahthlakte leh Meitei an intibuai a, state khat ni mah se vawiin thlengin intlawhpawh thei lovin an awm mek. Zo hnahthlakte chuan thla 30 chuang an buai hnuah pawh ngaihsak hlawh lo intiin lungawi loh lantirin kawng an zawh a ni.
An buai tirh atangin Zo hnahthlakte hian inrelbawlna hran an lo ngiat tawh a, Meitei-te nen hian rorelna pakhat hnuaia awmho theiah an inngaih loh avangin inrelbawlna hran neih hi ngiatin India sorkar hnenah pawh an lo thlen tawh thin.
Nilaini-a kawngzawhte’n UT an ngiat thu resolution an pass a, Churachanpur DC hnenah an thehlut nghal a ni.
Manipur hi President’s Rule hnuaiah an awm mek a, kawngzawhte hian President’s Rule a tawp huna sorkarin a tih hmasak tura an duh pawh an aupui a, UT an neihna tur hi sorkar tharin ziakin dah se, tuna assembly ding laite hun chhung ngeia tihhlawhtlin ni se an ti. Assembly term kal lai hi 2027 kum tir lama tawp tur a ni. 2027-a Manipur inthlanpui neih hma ngeia Kuki-Zo mipuite thil ngiat tihhlawhtlin hi an phut a ni.
Kawng hi hmun hnih, Sielmat Ground leh Koite Ground atangin an zawh tan a, Peace Ground-ah an intawkkhawm a ni.
Zo hnahthlakte’n UT ngiat thu pass
