Manipur tualchhung buaina kawihhnawiha Zohnahthlakte inzawmkhawmna tura din, Mizoram sawrkar pawmpui leh Central YMA hriatpui ‘Zo United’ chu tunhnaiah Zohnahthlak hrang hrang inrawnkhawmin ‘Kuki-Zo Council’ tia hming thlak an remti.
2023 September 7-a Central YMA office-a Manipur Zofa pawl hrang hrang aiawhten Mizoram NGO Coordination Committee uapna hnuaia an din, Zo United hi kum khat chuang a kal hnu ah a hming thlak duhna a awm a. Hemi chungchangah hian October 5 khan Lamka-ah Zo United hruaitute an thukhawm a, he pawla tel pawl hrang hrang 27 an kalkhawm a, pawl hming thlak chungchang rel niin, pawl pathum – Committee on Tribal Unity, Manipur Tribals’ Forum Delhi leh Kuki Inpi Saikul tenonline-in vote an thlak.
Pawl hrang hrang 30 zinga 9 chuan ‘Zo United’ hming chhawm zui zel an duh a, pawl 19-in ‘Kuki-Zo Council’ tia hming thlak an duh a, ‘Kuki-Mizo Council’ ti a thlak duh pakhat leh ngaihdan siam lo vote khat a tla a ni.
A tam ber duhdan angin ‘Zo United’ hming hi ‘Kuki-Zo Council’ tia thlak remtih a ni a. Politics pawla hlankai ni nghalin, Mizorama NGO Coordination Committee pawmpui turin an thutlukna hi thawn a ni anga, he pawl thar hi chawlhkar hnih chhunga inrem fel tura tih a ni.
Zofate inzawm khawmna hming thlak rel
