Zofate rorelna pakhat hnuaia awm chu MNF leh chief minister Pu Zoramthanga thil tum lian ber a nih angin, hemi tihlawhtling tur hian MNF chuan ke a pen zel dawn tih MNF Thalai president Dr L Thangmawia, MLA chuan a sawi.
MNF Lengteng South Block North Zone-in Pawlranga political training an neih a hmanpuinaah Lengteng bialtu MLA ni bawk Dr L Thangmawia chuan Myanmar, Bangladesh leh Manipur tualchhung buaina avangin kan unauten Mizoram an bel a, Mizoram sawrkar pawhin a theihna zawng zawngin kan unaute hi a lo kuangkuah a, an tan theihtawp a chhuah zel dawn tih sawiin, “Zofate rorelna pakhat hnuaia kan awm hi MNF leh chief minister Pu Zoramthanga thil tum lian ber a ni a. Hemi tihlawhtling tur hian MNF chuan ke a penzel dawn a, hemi kawnga hmalatu pawl leh mimal hrang hrangte hnenah lawmthu ka sawi a ni,” a ti.
Malsawmna dawn hmasak beisei leh hlawkna chauh um loa ram leh hnam, khawtlang dah hmasatu nih tum theuh turin Lengteng biala MNF hruaitute chu a chah a. Kum 2020 kumtir atanga Covid-19 hrileng chuan MNF sawrkar term chu kum hnih dawn a pawhtawi sak ang hial a ni, tiin, hemi chhung hian Mizoram sawrkar chuan ram hmasawnna lam aiin mipui dam khawchhuahna chu a ngaihpawimawh hmasak ber a ni tih a sawi bawk.
Zofate rorelna pakhat hnuaia awm hi MNF tum lian ber – Dr L Thangmawia
