ZPM sawrkar chu sawrkar hmasain theihtawp a lo chhuahpui tawh angin Zofa unau raltlante tan theihtawp chhuah chhunzawm turin a chah tih MNF party chuan an sawi.
MNF Gen. Hqrs. thuchhuak chuan, an duh reng vang ni loin Myanmar, Bangladesh leh Manipura cheng Zofaten harsatna namen lo tawkin, an chenna hmunah tihduhdah, nghaisak leh thah an tawk a. An nunna humhim turin ‘Zofate Jerusalem’ Mizoram an rawn pan tih a sawi a. Myanmar leh Bangladesh atanga rawn tlanlutte phei chu thawn let turin India sawrkarin na takin Mizoram sawrkar nawr mah se, kan thisen zawmpuite chu ‘dam leh tlang khatah thih leh ruam khatah’ tiin MNF kaihhruai sawrkar khan a lo hum a. Mipui nen tanghoin ei leh in, chenna leh thuamhnaw bakah zirna thlengin a pe a. An tan huaisen takin a ding tlang tih a sawi a ni.
‘Mizo hnamin a mawhphurhna tlansan loa, a dingnghet tlat angin, kan unaute hi an chenna hmun ralmuang a nih a, zalen taka nun an hman leh theih hma chu thlamuang taka Mizorama an awmzui zelna turin ZPM kaihhruai Mizoram sawrkar hi ding chhunzawm zel tur leh nghei loa an mamawh ang pe chhunzawm zel turin kan chah a. Zohnam inpumkhatna kawnga huaisen taka pa chan changa a din chhunzawm zel kan beisei a ni,’ a ti.
Zofate tan theihtawp chhuah zel turin MNF-in sawrkar chah
