Rev. Dr. Zaichhâwna Hlâwndo
Kum 126 (1899-2025) zet chu kan lo Kristian ve ta reng mai. Lal Isua Krista kan rin hma leh kan rin hnu a kan nun danglam nasatziate chu kan sawiin kan ziak kûr ngiai ngûai tawh. Eizawnna lamah te, zirna lamah leh ni tin khawsak dân phungah hma kan sawn nasatzia chu sawi sên pawh a ni lo hîal ang. Khawvel ram pum deuhthaw kan dâi dar ve tawh a, infiamna leh rimawi lam khawvêl pawh ni se kan duai ta bik lo. Missionary tirh chhuah lamah pawh khawvel hriat khawpin hma kan la ve hial a, Kristiannaah India ram mai ni lo khawvel ram zau zawkte hriat hlawh khawpin Lalpan min châwimâwi kan ti thei hial awm e. Chutiang taka Kristian kan nih atanga hmasâwnna nasa tak kan neih lâi chuan in enlêtna tur tam tak kan nei tih hi kan hriat a tûl hle mai. A bikin tuna Zofate kan Kristian dan hi a la him em? Tuna kan Kristian dân hi kan ram leh hnam tan a la tha zêl em? Kan Kristian dânte hi Bible nên a la in mil zel em? Eng hi nge siam that ngai tihte kan ngaihtuah thiam theih nân ka vei zualte ka rawn ziak dâwn a. Ngun taka chhiartuten lo zir chiang ve turin ka ngen tak meuh che u a ni.
A hmasa berah chuan kan Kristianna hian Zofate min tipumkhat nge min then darh? tih hi zir chian a tûl. Kan pi leh pute chu chhiatni leh thatni ah chuan “Thih leh ruam khatah dam leh tlâng khatah” tiin tho thil ang maia lungrualin an lo khawsa ho thin. Tunah chuan khaw khatah kohhran pawl hrang hrangah kan awm darh a. Mahni kohhran lâwina theuh tân thahnem kan ngâi a. Chhiatni leh thatniah pawh mahni kohhran pawla mi ni lo chu kan inngaihsak ta lutuk lo niin a lang. Mitthi dar ri kan hriat emaw tlangau kan han ngaithlak hnuah kan kohhran pawl a mite an nih leh nih lohvin kawngro a su thui viau ta niin a lang. Hei hi kan in enfiahna tur pawimawh tak niin ka hria. Kan khua emaw veng chhûnga chhiattâwkte an awm chuan kan khua leh veng chhûng mi an nihna a intawiawm kha Zonun ze mawi kan chhawm nun zêlna tur chu a ni.Chutiang bawkin lawmna niah pawh hian keimahni kohhran pawl deuh bikte chauh hi kan insâwmin kan inngâipawimawh bik niin a lang. Kristianna laimu chu “lawmte lawmpui leh tapte tahpui” a ni (Rome 12:15) tih kha Zofate Kristiante hian kan ngaihtuah thar a tulin hlein ka hria.
Pahnihnaah chuan Kristiannain a thuken laimu chu u leh naute mai pawh ni lo, thenawm khawvengte nena inremna (Matthaia 19:19) hmelmate pawh hmangaihna thu a ni (Luka 6:39). Tuna Zofate Kristian dan hi chutiang chu a la ni zel em? Kan Kristianna leh Kristian danah hian kan u leh naute, thenawm khawvengte nen kan la inrem zel em? Nge Kristianna avangin kan u leh naute, thenawm khawvengte hmelma ang maiin kan inenin kan insiam ta zawk tih hi kan inen letna tur chu a ni ang. Kan pi leh pu Kristian pawh ni ve hman lote kha lo tho lehin kan Kristian dan leh nun dante hi rawn hmu se engtin nge an ngaih ang? Kristianna avanga u leh nau in tuithlar duhte kan awm ta nuk mai em ni le? Kan kohhran pawl a tel ve lote chu misual ber chhuahin kan chhuah ta mai em? Tirhkoh Paulan Korinth kohhran a zilh ang deuh kha kan ni ta em? I Korinth 3:4 Mi pakhatin, “Paula pawl ka ni,” mi dang in, “Kei zawng Apollova pawl ka ni,” in tih chhung zawng mihring in la ni lo vem ni? a tih ang khan Kristianna hmangin u leh nau, thenawm khawvengte kan inthendarh a nih chuan kan inenfiah hle a ngai tihna a ni ang.
Pathumnaah chuan Kristianna leh Zonunmawi hi kan kal kawptir nge kan indo tir? tih hi zir chian a tulin ka hria. Kan hnam nun dan (culture) leh Kristianna chungchâng hi MA leh PhD degree lak nana ka lo hman ve a ni a. Ka zir chhuah leh keima tawn hriat atangin kan tih dik tawk loh leh tih fuh tawk lo tam hlein ka hria. Kan missionary lo kalte khan kan hnam zia leh Kristianna kalkawptir dan kha an lo thiam tawk lo deuh niin a lang a. Kan pi leh pute pawh khan an Kristian hmaa an thiltih thin kha chu hnâwl deuh vek tura ngaih dan an nei niin a lang. Chuvang chuan Kristianna kha chu British (Sap) tih dan anga tih ve tur nia ngaihna a lian hle. Tun thleng hian chu ngaih dan chuan kohhran mipuite rilru a luah nasat avangin Zonun zia kha Kristianna nena in hmehlo, Vanram kawngkhara luhna daltu lian tak ni a ngaihna kan nei niin a lang. Kan hnam zia kha a lo Kristian êm êm a ni tih kan hriat loh vang leh hnam ze mil zela Kristian mai hi Bible zirtirna nen a in rem thlap zawk tihte hi kan hriat a tul hlein ka hria.
A tawp berah chuan Krista tel lo Kristianna a awm thei tih kan hriat a tul. Lal Isua khawvel a lo kala a do ber chu sakhaw hruaitute leh sakhuana kha a ni a tih theih awm e. Pawn lam lan dana sakhaw tih dan tur zawm tha viau, chhungril lam nun thianghlim si lo, thlan hnawih var ang kha a nih theih. Zofate hian Lal Isua Krista ni lo, kan tih dan, rin dan, ngaih dan leh pawm dan hrang hrang hi kan buaipui ta lutuk em? Amah Lal Isua Krista theihnghilh thak khawpin kan thurin (doctrine) te kan tuipui ta zawk em? Pathian thu awih a, a duhdana nun aiin in hriat dik emaw sawi dik siak lamah te kan tlan nasa ta lutuk em? tihte inbih chiang ang u. Tuna kan Kristian dan anga kan kal zel chuan chhungkua, ram leh hnam kan inthen darhin kan indo zel dawn. Krista tel lo sakhuana luipuiin min chim pil hma hian kan than harh a ngai. Kohhran pawl hrang hrang kan awmte hi Krista tana pangpar rawng hrang hrang mawi takah kan siam thei. Chutih rual chuan pawl tana thahnemngaihna leh mahni tih dan chauh chawi sang a, midangte tih dan hmuh dik lohna hian Krista lal ram a dodal thei tih hriat a ngai. Zofate hi hun hnuhnungah Pathian Lal ram tana ding tur Pathian hnam thlante kan ni tih hria ila. Khawvel zawng zawng hi Lalpa ram a nih hma a chawl lova thawk tur kan ni tih hre bawk ila. Kristianna hi sakhuana satliah mai ni lovin Krista tana ding Krista aiawhtute kan ni tih i hre thar leh ang u.