January ni 11 kha Pu Buanga leh Sap Upa te’n chanchin
tha hril tura Mizoram an thlen champhaphak a ni a, Zofate ni pawimawh a ni.
1894 January ni 11-ah khan Arthington Aborigine Mission tirh Rev JH Lorrain (1870 – 1944) leh Rev FW Savidge (1862 – 1935) te’n Mizoram an thleng a, Pu Buanga leh Sap Upa tiin Mizote’n an ko a ni.
Anni pahnih hian Isua chanchin an hril bakah A AW B te siamin zirna bul an tan a, Zofate tan an thawhhlawk hle. Sakhuanaah chauh ni lovin thil dangah pawh Zofate khawhawi a inthlak a, 1894 January ni 11 hnu lam leh a hma lam tiin Zofate chanchin pawh then thin a ni.
January ni 11 Baptist Kohhran chuan Missionary Day-ah puangin hun an hmang a, ruai te pawh an theh thin.
Baptist Church of Mizoram hian January ni 11 hi Missionary Day tiin, tualchhung kohhran hrang hrangah hun an hmang thin a, ni pawimawh niin, hrilen lai, punkhawm theih a nih loh lai pawh khan a remchan dan ang angin kohhran hrang hrangin hemi ni hian hun an hmang a ni.
Mizoram Presbyterian Kohhran chuan January ni 11 ni Kohhran din tan ni an ti a, 2014 Synod Inkhawmpuiah khan “Kan Kohhran din kum chu 1894 January ni 11 a ni ee,” tiin an rel.
2016 Synod Inkhawmpuiah January ni 11 chu Synod ni pawimawhah telh ve ni se an ti a, 2018 atangin Synod calendar-ah telhin, chawlhah an puang bawk.
Presbyterian Kohhrante hian he ni hi tualchhung kohhranah an hmang a, Synod chuan chawhma inkhawm leh zan inkhawm programme an duang.
Mizoram sorkar pawhin chawlhah a puang a, I&PR department buatsaih calendar-ah chuan January ni 11 hi Missionary Day tih a ni.
Pu Buanga leh Sap Upa te kha Thingpui Huan Tlang-ah an inbengbel a, he hmunah hian anmahni hriatrengna lungphun pawh a awm.
Zofate’n ni pawimawh hmang
