Mizorama football fan-te tan chuan Thawhtanni kha kut tiak ni ang mai a ni; football fan han tih hian Mizoramah chuan “mipui” an tling a, World Cup hnuhma pawh a lang chiang reng a ni!
Social media-ah leh khawlaiah World Cup hlimthla hi hmuh hmaih rual lohvin a lang a, Aizawlah chuan final khelh zawh atang khan khawlai a ri chuah chuah. Halpuah hal te pawh an awm. Vanapa Hall kawt velah inkhel en zo an pungkhawm a, an ri luih luih mai.
Chhun lamah, a bikin chawhma lamah khawlai a thawl a, final vangin sorkarin zirna in chawlh a puan bakah sorkar office tan hun a sawn hla bawk nen, ni danga traffic jam hun angah pawh kawngpui a thawl.
A huhova en te, antena her te kha mi thenkhatin tun hma thil emaw an ti mai thei a, mahse hmun hrang hrangah a huhova en an la awm a, tun hma antenna ang ni lo dish antenna her an la awm bawk.
A huhova en thin khaw pakhat chu Parva III an ni a, Mizoram chhim tawp khua hi World Cup thliin a nuai hle.
In 100 vel an ni a, DTH (Direct to Home) nei in pasarih an awm. Internet a chak tawk loh avangin DTH neite inah hian an enho thin a, nuam an ti hle.
“In pasarihah kan en a, in khatah hian mi 20-30 vel chu kan ni ziah ang a, an tam bernaah chuan mi 40 tlin tum pawh an nei. Half time laiin lakhuihthei te kan ei a, nuam kan ti ve khawp mai,” Parva III tlangval David-a chuan a ti.
DTH hian dish antenna a hmang a, a fiah loh chuan chu chu her a ngai thin. DTH hmangte chuan an la her a, Parva III-ah pawh chutiang chu a ngai.
“Ruah a sur tam deuh chuan a fiah lo thin a, dish hi her a ngai thin a. Argentina leh England inkhelh tum khan ruah vangin a fiah lo a, kan her nasa. Mahse in tam zawkah a fiah thei lo a, khami tum kha chuan in pathumah chiah a fiah theih avangin in pathumah kan en,” David-a chuan a ti.
A huhova en thin khaw dang pakhat, Sialsir-ah chuan final zan khan an tum danin an en thei ta lo; VC leh YMA huaihawtin Community Hall-ah a huhova projector hmanga en an tum a, mahse a fiah theih loh avangin an ti thei ta lo.
Sialsir-ah hian DTH nei in pakhat leh Jio internet connection nei in pahnihah a huhovin an en thin a, final kha DTH hmanga Community Hall-a en an tum a ni. Mahse, an han bei ngial thin a, a fiah thei lo. Zan dar 12.30-ah inkhel an tan dawn a, dar 12 velah an beidawng. In pathumah an en leh ta a ni. DTH neite kawtah projector hmanga en an tum leh a, mahse ruah a sur avangin chu pawh an ti thei ta lo. Tichuan, an tih thin dan pangngaiin in pathumah an inhnawh leh ta a ni.
“World Cup hi kan en nasa a, nuam pawh kan ti a, khawtlang pawh min tilungrualin ka hria. Final phei kha chu en kan tam bawk a, Thawhtanniah feh pawh kan tlem phah,” Sialsir tlangval Malsawma chuan a ti.
Final zanah khan Sialsir-ah hian YMA office bearer-te’n sawhchiar an tum a, in pathuma final ente’n sawhchiar an pir.
Aizawlah pawh a huhova en leh hmun danga en hi an la thahnem a, World Cup lai khan inkhelh zawhaha khawlaiah lirthei a pung thin kha chumi finfiah nan chuan a hman theih ang.
Zofate’n World Cup an en e
