Zohnahthlak pawl hrang hrangte huang khata inkhaikhawmna hming hmasa atan ‘Zo United’ tia kalpui rel a ni.NGO Coordination Committee Mizoram kaihhruaina hnuaia Manipur-a Zohnahthlak pawl hrang hrang hruaitute inhmukhawm chuan inlungrual takin pawl pakhata an inkhaikhawmna tur ‘Zo United’ tih hminga kalpui phawt hi an rel a. Tun dinhmuna Manipur-a Zohnahthlakte zingah inpumkhatna leh thawhhona tha tak a awm theihna turin, ‘Zo United’ din phawt nise, an ti.
Kumin September 20 hmain hruaitu inruatfel nise, hruaitu inruatnaah hian hnam hrang hrang (Inpui/ Inpi) leh tribe aiawh pakhat theuh leh Indigenous Tribal Leaders Forum (ITLF), Committee on Tribal Unity (COTU) leh Hill Tribal Council (HTC) aiawh pakhat theuh telin hruaitu hi inruat nise an ti.
Inpumkhatna tura pawl din ‘Zo United’ hming hi hnam bil hming chawia phuah niloin, Zohnahthlakte inpumkhatna tur leh thawhhona tur chauha hming phuah a ni tih sawi a ni.
Inhmuhkhawmah hian Manipura Zohnahthlak pawl hrang hrang inthlunzawmna tura pawl ding tawh, engemaw avanga ding mumal ta lo pahnih – Coordination Committee on Separate Administration Manipur (CORSAM) leh Joint Inpi Council (JIC) te chu thiah nise tih a ni bawk.
He hunah hian Manipura Zohnahthlak pawl hrang hrang aiawh 16 leh MLA 6 an tel a ni.
Zohnahthlak inkhaikhawmna hming hmahruai ‘Zo United’
