Zohnahthlakte inkara inpumkhatna tha zawk siam dan tur relin NGO Coordination Committee Mizoram leh Manipur Zohnahthlak pawl hrang hrang hruaitute an thukhawm.Central YMA Hall-ah NGO Coordination Committee hruaitute leh Manipur-a Zohnahthlak hnam hrang hrang leh pawl hrang hrang hruaitute hi Nilaini khan inkawmin, Zohnahthlak hnamte inpumkhatna tha tak a awm theihna tur sawikhawm a ni.
NGOCC chairman, Central YMA president R Lalngheta chuan kaihruaiin, pawl hrang hrang hruaitute hian inunauna tha tak a awm theih nan an ngaihdan leh duh dan, kal dan tur nia an hriatte an sawi a. Hei hian boruak tha tak hring chhuak ngei se an duh thu an sawi bakah ngun zawka la rel leh nise an ti.
Manipur-a Zohnahthlak hrang hrangte hi Aizawlah an cham mek a. Nilaini vek khan chief minister Zoramthanga hmu in an inkawm a. Mipui thlan hruaitu minister leh MLA thenkhat bakah Manipur-a pawl hrang hrang – Mizo People’s Convention, Kuki Students’ Organisation, Hmar Inpui, Committee on Tribal Unity, Zomi Council Student Organization leh pawl dang aiawhte an ni.
Chief minister chuan Manipur-a boruak thalo thleng avanga mipui tam takin harsatna an tawk chu pawi a tihpui thu a sawi a. An kal zel dan turah pawl hrang hrang leh mipuite uluk taka inrawnkhawmin, ngaihtuahna fim tak nen hma lak pawimawh a tih thu a sawi. Mizo mipui chuan Zohnahthlak unaute chu puih an ngaihna laia puih zel an inhuam tih a sawi bawk.
Zohnahthlakte inpumkhatna tha siam dan tur sawikhawm
