Aizawl West-II AC bialtu MLA, minister Lalnghinglova Hmar chuan a bial chhung Vaivakawn huamchhung Zohnuai atanga Rangvamual kalna tur kawng chu Inrinni khan a hmunah enin hmalak dan tur sawiho a ni.
Vaivaikawn Zohnuai leh Rangvamual inkalpawhna kawng siamna tur hian Special Assistance to State for Capital Investment (SASCI) hnuaiah cheng vaibelchhe 5.7 dah a ni a. 2025 December 20 khan bialtu MLA bakah Land Revenue & Settlement minister B Lalchhanzova, adviser to CM (Finance) TBC Lalvenchhunga, adviser to CM (Political) Lalmuanpuia Punte te nen a hmunah an en tawh a. Chumi tuma rel angin PWD-in kawng kal dan tur preliminary survey an nei tawh a, km 1.4 vela thui tura ngaih a ni.
Hmalak theih dan hrang hrang sawiho hnuah Sairang kawnghlui cheithat theih dan ennawn leh nise tih a ni a, kawng chhehvela mimal ram awm dan pawh Vaivakawn Local Council-in lo endikin, biak tur tul an lo bia anga, Land Revenue & Settlement department-ah survey nei tura dil nise, tih a ni.
BIaltu MLA hian, Aizawl khawpuithang chho zelah Sairang lam atanga Vaivakawna lirthei lut, traffic jam nasa thin lutuk tih ziaawm a tul tih a sawi a. Tuna kawng ruahman hi a hlawhtlin theih chuan Vaivakawn, Luangmual leh Aizawl tlak lam veng zawng zawng tan a tangkai hle dawn tih a sawi a ni.
Kawng siam tur sawihonaah Aizawl West-I bialtu MLA TBC Lalvenchhunga pawhin tuna kawngpui siam tumna chu a bial tana kawng pawimawh a ni a, kawng zal tha nuam zawk awmsaa siam tum phawt a finthlak dawn, tiin, kawng tlo leh tha siam tura ruahmanna fel neih a tul tih a sawi.
Zohnuai-Rangvamual kawng siam tum en
