Zonal office hawng thar

Zonal Geology & Mining office Lunglei chu Inrinni khan Industries minister Dr R Lalthangliana’n a hawng.
Zonal office thar hian thawktu post 10 a siam nghal thu leh geologist pawh dah thuai tum a nih thu a sawi a. Department lian ni lo mah se an pawimawh tih sawiin, sawrkara an sum chhunluh pawh awihawm loh khawpa sang a nih thin thu te, tunah pawh kum hnih khat chhungin cheng vaibelchhe 12 chuang an thawhchhuah thu te a sawi.
“Zonal office hian sum thawh chhuah kawngah nasa zawka hma a sawn beisei a ni. Thawhchhuah awm loa, a eiral zawng ringawta ram a kal thin hi bansanin, lakluh tam zawk a awm theih nan zonal office hi duan a ni,” a ti.
Goelogy & Mining department hotute sawi danin, he zonal office bikah hian thawktu 13 awm tura ruahman ni mah se, tun dinhmunah a kimin dah theih an la ni dawn lo a, sawrkarah hna thawk thei tura a tul zual tal dah tura ngen a ni.