Mizoramah Higher & Technical Education department hriatpui college/ institution 23 awm zinga 19 chuan National Assessment and Accreditation Council (NAAC) accreditation an nei a. Hetihlai hian National Education Policy 2020 hnuaiah NAAC accreditation nei chauh puihna sum pek theih a ni tawh dawn.
H&TE minister Dr R Lalthangliana sawi danin, NAAC accredited institution ni lo ten sawrkar atangin hmasawnna tur sum (funding) an dawng thei tawh dawn lo a. Mizorama college 19 chuan RUSA 2.0 Grants an dawng a. Mizoram college zingah NAAC accreditation grade A+ hmu 1, grade A hmu 2, grade B++ hmu 2, grade B+ hmu 2, grade B hmu 8 leh grade C hmu 4 an awm.
NAAC accreditation-ah hian India ramah Mizoramin zaa 83 hmu in a sang ber a, a hnaih bertu pahnih Chandigarh leh Ladakh chuan zaa 60 a hmu a ni. Manipur University hnuaia college zingah phei chuan grade hmu sang berin B++ an hmu tih minister hian a sawi.
Mizoram sawrkar college zinga 15-ten ‘Infrastructure Grants to College’ component hnuaiah cheng nuai 200 theuh an hmu tawh a; college dang pali – Govt. Mamit College, Govt. Saiha College, Govt. Saitual College leh Govt. J Thankima College ten ‘Upgradation of Existing Colleges to Model Degree College’ component hnuaiah cheng nuai 400 theuh pek an ni.
Mizoram sawrkar college NAAC accreditation nei 19-ten RUSA 2.0 hnuaia grants an dawn vek bakah sawrkar college paruk – Govt. Aizawl West College, Govt. J Buana College, Govt. J Thankima College, Govt. T Romana College, Govt. Mizoram Law College leh Govt. Hrangbana College chu campus thar leh a zauhna atan hmunhma pek an ni.
Zoram college/institution 23 zingah NAAC accredited 19
