Lalchhandama Colney
Ph – 9862982321
Campaign thawm a na tual tual, a hun tawh reng a ni. Mipuite pawh kan inrin ve a hun, tun kumah chuan politics lam ngaihsak vak lo tan pawh min chiah hneh ve hrim hrim a, kan hre ve viau ngei ang. Sawrkar tha kan duh a, kan iak kan iak a, mahse, keimahniho zing atang bak chuan han thlan tur an awm chuang lo. Mi ram hruaitu tha tak tak chanchinte kan hre thin a, mahse, anni chu kan ti thei ngawt si lo heng party kan neih ve ho – PM, Congress, MNF, P.C., BJP, etc.,atang chauh lo chuan kan thlang thei si lo. Rilruah kan thlang tling sauh sauh ang a, min phatsan leh si ang tih hlauhthawnna nen, mi tha thlan chhuah tur pawh hmuh thiam a har hle mai. Aw le, engpawhnise, kan politician neih ve ho chu kan duh emaw duh lo emaw an ni lo chu tih tur dang an awm si lo, kan thlan chhuah ve leh ngei chu a ngai dawn a ni. Vawiinah thiam ang tawkin kan party neih ve hote in lo zir chiang tlang dawn teh ang. ZPM – Anni hi party thar deuh an ni a, an hotupa chu Pu Duhawma a ni. Politics lamah chuan tawnhriat ngah tak a ni a. Amah hi mi lehkhathiam tak a ni a, India rama mi pangngai chunglam ni ve phak a ni. Kan hre theuh anga ram hruai an tum dan chu kuthnathawkte dah hmasak, Mizopa taka sawrkar kalpui a, dan chhunga thil ti zel siin, eiruknate pawh na taka do an tum a ni. Inthlan hmasa khan an la in-register fel lo va, independent candidate angin an ding a ni. Khawpuiah chuan an tla na ang reng viau a, mahse, zokhaw lamah erawh, kha tih lai kha chuan an tla na vak lo niin a hriat. Sawrkarna la chelh chhin miah lo an ni a, eng nge an chanchin tih leh chanchin tur hi a hriat hleih theih loh. Engpawhnise, an party policy leh manifesto-te a tha viau a, mahse, lo sawrkar ta se, an kalpui thei tak tak ang em, rei lo teah hian lalna leh sum bawihah mipuite min pensan ve daih ang em, i’n lo thlir zel teh ang.
Congress – Anni hi party upa tawh tak mai an ni a, central lama zawm nei an ni. An hotupa hi Pu Hawla a ni a, mahse, tun tumah chuan a hmel kan hmu tawh dawn lo a ni, a retired a lo hun ve tawh a, a leh lamah chuan a lawmpuiawm khawp mai, pension thlenga thawk thei chu. An hruaitu thar hi Pu Sawta a ni a, politics tawnhriat ngah tak a ni a, mithiam tak a ni. Mizoramah tum eng emaw zat sawrkarna an lo chelh tawh a, remna leh muanna atana lalthutthleng hial lo kian tawh an ni. Hriat theih chinah an sawrkarah hian administration lam hi a fel thei viau a, sum enkawl pawh an thiam viau emaw ni chu a tih theih. Hmasawnna hnathawhah hian an theih ang angah an tha viau, eirukna an dona kawngah pawh hian an tha viauin a hriat bawk. Chutih lai chuan thlemna an do zo lo nge, Mizoram sum harsatna sutkian nan zu an zuar ta hlauh thung. Kristian ramah sawrkarin zu an zuar tlat chu thil tih chi mang loh a ni, i’n lo thlir zel teh ang. MNF – Tualto party upa tawh tak an ni, ram tana lo rammu tawh, hrehawm tam tak karah Mizoram tana lo pen chhuak tawh an ni. Tuna an hotupa hi Pu Zorama a ni, thusawi thiam tak a ni a, a chang phei chuan a thiam mah mah em maw ni chu aw, an ti. Sawrkarna lo chelh fo tawh an ni a, tun dinhmunah chuan kan party neih pangngai ve tak a ni. Sawrkar lai mek an ni a, an that leh that loh chu kan hre theuh awm e. Sawrkar a rethei si a, zu a zuar ngam ve bawk si lo va, sum hmuhna tur em em nei hek lo, a hnathawkte hlawh pawh a hunah a pe thei ngai lo. A leh lamah chuan hetia zu zuar ve lova ram a retheihpui ngam hi a tha ve ang reng, huaisenna chi khat chu a ni vein ka hria. An sawrkar chhungin kumhnih ngawt chu Covid hriin min han nuai zui bawk a, hri an do danah te pawh an that leh that loh chu a hriat theih bawk ang. Kum nga kal ta chhung kha han thlir let la ngun takin, tute nge an nih chu i hriat mai theih ka ring. Sawrkarna hi chelh leh ta se engtin nge kan ram chu a awm ang, i’n lo thlir zel teh ang.
Party-te chanchin kim lo takin kan han tarlang a, mahse ngaihdan tur chu min pek theih tho ka beisei. Eng pawh nise, kan ram tana lo pen chhuak party-te, eng ang pawh ni se, a khawi emaw ber chu kan thlawp a ngai ve hrim hrim a ni. Kan tawngtai anga Pathianin mi tha tak min pe mai thei asin, beidawng lovin i bei zel ang. Kan dam anga kum tawpah chuan sawrkar tur chu a hriat tawh ngei ang, Congress an chak ber a nih chuan, a ni maw, tiin i pawm thiam zel ang, chutiang bawkin party dang pawh. Mahse, vawiinah chuan kan inrinsiak a la ngai hrih si a, mahni party tan zawng theuh kan sawrkar ngei ngei dawn kan la ti thei a ni. Inthlan boruak te hlim takin hman tum ila, thil dik lo lam pang kha chu i hawisan zel ang. Pathianin ram tana min pek tur hi beisei takin ilo thlir ngawt mai teh ang.