Manipur-a Zohnahthlak leh Meitei intihbuaina thu kalzelah Meitei pawl thenkhat ten kawng zawha amah duh lohna thu an auchhuahpui leh a lim hial an hal chu pawi tihna leh huatna a nei hran lo tih Mizoram chief minister Zoramthanga chuan a sawi. Inrinni leh a hma lamah pawh Manipur-ah Mizoram chief minister hi an state chhunga chi leh chi buainaah tan lam neia inrawlhah puhin an duh lohna an lantir a, Manipur chief minister N Biren Singh chuan an state chhung buainaah state dang chief minister chu inrawlh lo turin a lo vaukhan tawh bawk.
Hemi chungchang zawhnaah Zoramthanga chuan, Meitei hoin amah duh lohna lantir a li an hal chu a ngaih huat hran loh thu sawin, democracy ram kan nih angin an thiam danin an auchhuak ve a, an zalenna an hmang ni ve maia a ngaih thu a sawi.
NGO Coordination Committee huaihawta Mizorama Manipur Zohnahthlakte thlavang hauh kawng zawhnaa a tel ve chhan pawh, Manipur-a buaina hi tih reh thuai nise, remna leh muanna awm se, tiin a thisen zawmpuite thlavang hauhna a nih vang a nih thu a sawi bawk.
Manipur CM-in an state chhung buainaa inrawlh lo tura a tih chungchangah MNF president ni bawk Zoramthanga chuan, MNF movement-ah Zofate luah chin ram rorelna pakhat hnuaia dah chu, amah Biren Singh pian kum, 1961 pawh khan an lo kalpui tan daih tawh a, chutah chuan Manipur-a Zohnahthlakte chenna pawh hi a tel tih a sawi.
MNF leh India sawrkar inrem dawn khan hemi chungchang pawh hi an thu khel ber pakhat a nih reng thu sawiin, India Constitution Article 3-ah state ramri siamrem leh theihna hi a awm tho avangin, inbiaknaa India sawrkar aiawhte hian ‘aw’ leh ‘aih’ an ti duh loa, Assam atang pawhin state dang a lo piang ang bawkin, hei hi thil theih loh emaw a ni lo tih a sawi a ni.
Tuna Manipur buaina chu sawrkar laipuiin politics atanga dawhkan kila chinfel ngai nia a hriat thu Mizoram chief minister hian a sawi.
BJP kaihhruai NDA-ah MNF chu a la tel zel a; amaherawh chu an thu ken apiang an thlawp ve zel tihna a ni loa, Uniform Civil Code pawh hman a nih dawn a, Mizoram a huam ve dawn a nih chuan NDA-ah an tel zel theih loh tur thu Zoramthanga hian a sawi a. Chutihrualin, NDA hruaitute chu thil thlir thui leh fing tak tak an nih avangin, hetiang thlen ngaiin thil an kalpui luih a ring lo tih a sawi a ni.
Zorama’n a lim haltute haw lo
