Zotrek Adventure Club chuan an duanlawk tawh angin khawvela ‘sandstone cave’ thui ber Krem Puri, Meghalaya-a awm chu an lut dawn a. Inrinni khan Caving Expedition Team hi Aizawl deputy mayor R Thanglura’n Aizawlah a vailiam.
Zotrek Adventure Club hian October 23 leh 24 ah puk hi an lut anga, October 24 tlaiah Aizawl panin an lo haw ang.
Zotrek hi Mizoram adventure club lian ber niin, club member 120 chuang an awm mek a. He caving expedition-ah hian club member mipa 20 leh hmeichhia 10 an vaiin mi 30 an kal dawn a ni.
Krem Puri hi khawvela sandstone cave thui ber niin km. 24.5 a thui a ni a. He puk hi Liatsohum, Mawsynram district Meghalaya-a awm niin, Shillong atangin km.56 vela hlaa awm a ni. Krem Puri hi kum 2016 khan hmuhchhuah a ni. International expert team, scientist leh experience cave explorers rual, ram hrang hrang atanga kalkhawmten ni 25 chhung (2018 February 5 atang March 1) survey neiin puk hi an zirchiang a, an teh chhuak a ni. Survey an neih lai hian puk chhung atang hian kum makdatuai 66 kalta vela dinosaur ruhro nia hriatte pawh an hmuchhuak a ni.
International team hian puk kawkel/ passage survey hman loh tlem an nei a, Zotrek Team hian a theih chin chinah luh chhuak an tum dawn a ni.
Zotrek Adventure Club hian kum 2014 khan Krem Mawmluh Cave, Meghalaya an lo luhchhuak tawh a, Krem Mawmluh hi leilung chanchin zirnaa puk pawimawh a ni. Zotrek hian Mizorama puk hrang hrang lutin an lo teh chhuak tawh thin a ni.
Zotrek-in Krem Puri an luhchhuak dawn
