Zoram People’s Movement party chuan a mala sawrkarna siam thei turin seat 40 awmna Mizoram MLA inthlanpui 2023 ah seat 27 an la a, seat dang 13 la awm chu party pathumin insemin, sawrkar lai MNF chuan seat 10 an la. Mizoram inthlanpui-a vote tla hi Thawhtanni zing dar 8.00 atang khan chhiar tan a ni a, chawhnu herah chuan sawrkar thei turin ZPM party an chak dawn tih a hriat hman tawh a ni. Aizawl district-a assembly contituency 12 chu ZPM hian an la vek a, Aizawl Municipal huamchhunga constituency 11 leh AMC pawnlam pakhat a ni. Lunglei district-a bial 6 awmah Municipal-in a huamchin bial 4 pawh ZPM hian la in, Champhai district-a bial thum awmah bial hnih an la a ni. Saitual district-a bial thum awm leh Serchhip district-a bial thum awm chu ZPM hian an la vek. Kolasib district-a bial thum awmah bial khat an la a, Lawngtlai district-a bial thum awmah bial khat la in, Khawzawl district leh Hnahthial district-a bial khat ve ve awm chu an la bawk. Mamit district-a bial thum leh Siaha district-a bial hnihah erawh an chak zo lo vek thung.
MNF party-in 2018 inthlanpuia an lak loh Lawngtlai district-a bial khat la in, bial khat an chan thung a; tun inthlan dawnah Siaha district-ah bial neih sa an neih loh avangin an chana ngaih theih a ni lo. Aizawl district-ah bial khat chauh an humhim a, Mamit district-ah an bial ngai pahnih an humhim bakah a dang pakhat la awm an lak belh a, Champhai district-ah an bial ngai pakhat an hum. Lunglei district-ah bial hnih chu Congress kut atangin MNF hian an chhuhsak ve ve a, Kolasib district-ah bial hnih hum zuiin, Lawngtlai district-ah bial khat lak thar an nei a ni.
Indian National Congress chuan 2018 inthlana an bial lak pali an chan a, MLA neihchhun ni turin Lawngtlai West an humhim zui a ni. BJP-in inthlan hmasaah bial khat chauh an lak laiin tun tumah hian Siaha district-a bial hnih an la ve ve thung a ni.
Political party hminga chuh zingah AAP chuan seat lak an nei loa, independent-a ding mi 27 zingah tling an awm lo.
ZPM hian independent angin 2018 inthlanpuiah an chuh tan a, seat 7 an la a ni. Election Commission hriatpui party an nih hnu ah a tum khatna atan party angin 2023 inthlanpui hi an chuh a ni.
A tlingte kum dinhmun
Kum zat 2023 2018
MLA zat MLA zat
1. 30-40 3 1
2. 41-50 11 16
3. 51-60 14 12
4. 61-70 11 9
5. 71-80 1 2
Average Age 53.9 53.6
42023 MLA tling thar zingah kum 40 hnuai lam pathum Baryl Vanneihsangi (32) Aizawl South-III; Jeje Lalpekhlua (32) South Tuipui leh V.Malsawmtluanga (34) Lunglei North te an awm a, ZPM vek an ni. 2018 MLA election-ah khan kum 40 hnuai lam pakhat TJ Lalnuntluanga (MNF) Champhai South a tling a, a tlin khan kum 39-a upa a ni.
42023 MLA election-a kum 70 chin chunglam candidate mi 8 zingah, kum 73-a upa Lalduhoma ZPM Serchhip bial chu a tling awm chhun a ni a, 2023 election-a tling zingah a upa ber a ni bawk.
4District 11 huamchhunga assembly constituency 40-a vote tla hi zing dar 8.00 atangin counting centre 13-a counting hall 40-ah boruak muanawm tak hnuaiah chhiar a ni a. Khawzawl district Tuichang AC vote chhiar zawh hmasak ber niin, zing dar 9.47 ah an chhiar zo a, chhun dar 12:00 hma in vote chhiar hi zawhfel thawkhat niin, result tlangpui pawh a hriat theih tawh a ni.
4Section 73 of the Representation of the People Act 1951 (43 of 1951) in a phut angin State Legislative Assembly thar din turin inthlan result hi RO ten an puan vek hnuah ECI chuan thlantlin tharte hi official gazette-ah tichhuakin due-constitution notification a siam hmasa anga, notification hi vawiin – December 5 chawhnu hian ECI leh CEO office-a senior official-ten larsap hnenah an hlan ang.