ZPM an tla dawn chiang
– Dr R Lalthangliana
ZPM sawrkar chu a tla dawn chiang a, MNF lo chu a thlaktu tur dang an awm lo tih MNF senior vice president Dr R Lalthangliana chuan a sawi.
Nilainia MNF Gen. Hqrs. organiser-ten political training an neih a hmanpuinaah Dr R Lalthangliana chuan, MNF chu kan ram kan hnam himna turin a tlanchhe ve thiang lo tih a sawi a. Pathian dah hmasa chungin ram rawng an lo bawl tawh thin a, a kal zel dawn tih a sawi. ZPM sawrkar chu reilote atana rawn lang ve zawk an ni tih a lang tan tawh nia sawiin, “An sawi ang ni lo hlirin thil an ti a. A la rei lo hle naa an lakah mipui an beidawng tan der tawh. Tunhnaia Sinlung Hills Council inthlanah kan tling a, ZPM tan chuan kun ngawih ngawih na tham a ni,” a ti a. ZPM chu a tla dawn chiang a, MNF lo chu ZPM thlaktu tur dang an awm lo tih a chiang tih a sawi.
MNF treasurer Lalruatkima pawhin ZPM sawrkarin sawhthing, aieng, hmunphiah leh hmarcha lei turin an insawi a. An hlawhchham an ring nge, thlai thar hmaa inthlang hman turin VC/LC inthlan nasa takin an pawthnai ta ringawt tih a sawi. “Hand holding an ti a, thalaite banah kan kai dawn an ti a, min kai ta a, bank-ah min kailut a ni. Loan min puk tir an tum ringawt mai a, mirethei leh thalaite leiba min siamsak an tum a ni,” a ti.
ZPM an tla dawn chiang – Dr R Lalthangliana
