April 19-a Mizorama Lok Sabha member thlan turah rorel lai party ZPM candidate Richard Vanlalhmangaiha chuan Zirtawpni khan Aizawl district returning officer, district election officer Nazuk Kumar hnenah nomination paper a thehlut.
ZPM candidate chuan ram tan theihtawpin ke a pen dawn a, sawrkarin a duh anga a kalpui theih tur mi chak leh tha tak nih a tum tih a sawi. MP candidate dangte pawh mi tha leh chak tak tak an nih rualin, Pathian leh mipui zarah tlin ngei an inbeisei tih a sawi a ni.
“Pathian zara kan tling a nih chuan, Mizoram sawrkar nena ke pen rual tur ka ni a. Central lama kan project-te chak taka bawhzui ka tum a, sum tam thei ang ber state sawrkar tana hnuhchhuah hi ka thil tum a ni,” a ti.
Central lama zawm tum a neih leh neih loh chungchanga zawhnaah, a tling a nih chuan khawi lamah nge a thut anga, khawi lam nge a vote ang tih chu an party thu thu a ni dawn tih a sawi a ni.
Nomination a file-naah Richard Vanlalhmangaiha hi ZPM president Lalliansawta leh chief minister Lalduhoma bakah an party hruaitu thenkhatin an tawiawm a ni.
ZPM candidate-in nomination file
