R.Lalhmangaiha
Bethlehem
ZPM sorkar chu kum khat hmel kan lo hmu ta reng mai, campaign lai khan thil tha zawng zawng sawiin an inzuar a, ‘kan ti ang’ tih te, ‘kan ti ve lo ang’ tihte an ngah em em a, thalai, sorkar hnathawk leh mipui tam berin an kutah rorelna an pe ta a nih kha.
ZPM sorkar hian mipui hmuhah leh lang lo lamah pawh thil tha tih tam tak chu a nei ngei ang. Amaherawhchu, kum khat zet an sorkarah hian mipui beisei an pha lo tih chu phat rual a ni ta lo.
Heti khawpa mipuiah sum leng vak a tlem em em lai leh, sorkar hnathawk hlawh la tur pawh social media news a tlin tak hial rual hian chhungkaw inhaivurna lamah chuan sum an ren lo hle mai.
‘Kan ti ve lo ang’ titute chuan an Vice President chu state planning board vice chairman-ah dahin cabinet minister rank a ni a, hamthatna cabinet minister-ten an dawn ang zawng zawng chu a dawng turah ngai ang.
MLA 4 lai leh MLA ni lo pakhat chu Adviser to Chief Minister-ah dah an ni a, Minister of State rank an ni.
A hming mawiah thla khata cheng khat hlawh tiin, ZPM consultant ni lai pakhat chu Mizoram Resource Mobilization Committee Vice Chairman-ah ruatin, IRS (Rtd) pakhat pawh Project Monitoring Committee Vice Chairman-ah an dah a, Minister of State rank pek an ni ve ve bawk.
Heti hian Minister ni si lo, Cabinet minister rank pakhat leh Minister of State rank 7 nen, an vaiin mi 8 kan nei mek. Constitution Article 164 (1A) ang chuan MLA neih zat atanga 15% aia tam Minister ruat theih an ni lo. State lian lo kan nih angin 15% aia tam Minister 12 kan nei thei a ni chauh zawk. Tunah hian Minister 20 hamthatna leh chanvo nei kan kawl mek reng tihna a lo ni.
Aizawl tlak lam veng pa pakhat chu cheng khat hlawh tiin, rank and status of Secretary to GoM pek a ni a, Addl.Director, Commerce & Industries Department ni lai chu OSD to CM-ah ruat a ni bawk.
Thla khata cheng khat hlawh bawkin OSD to Agriculture Minister atan Secretary, GoM rank-ah mi pakhat ruat niin, Secretary rank tho, cheng khat hlawh bawk turin Project Monitoring Committee Secretary an awm bawk.
Cabinet minister rank te, MOS rank leh thla khata cheng khat hlawhte hian office changtlung tak neiin, staff engemaw zat an nei theuh ang a, sum senso tam turzia chu kan hrethiam mai awm e.
Mithiam leh fel tak Education Minister kan nei emaw mipuiin kan tih lai leh, Academic Officer rual leh mithiam tak tak kan neih laiin; Secretary rank-ah Consultant atan ZPM Vice President kal chhuak ta chu ruatin, office hran leh staff hran a nei bawk.
MLA hlawh leh hamthatnate hi mipuiin kan thik hauh lo. Mahse, kalphung thar sorkarah chuan mipuiin inhrek deuh tura an beisei laiin, a letling thawkin an kalpui a, ‘Tlawng vuaka Mat dap’ tih ang chauh a ni.
MLA mahni Ina chengte chauhin an dawn thin, house furnishing pawh MLA zawng zawng, mahni Ina cheng kher lote tan pawha dawn theih turin, an MLA kum khatnaah cheng nuai 2 dawngin, a kum leh zelah cheng 50000/- an dawng zel ang.
In leina (In sakna) tur housing loan tha mi cheng nuai 20 an dawn thin pawh nuai 30-ah tihpun a ni a, a pung pawh 5.5% p.a. a ni nghe nghe. MLALAD Fund (MLA fund) pawh cheng nuai 150 atangin nuai 200-ah tihpun a ni. PA to MLA hlawh chu cheng 20,000/- atangin cheng 35,000/-ah tihpun a ni bawk.
An sawi angin MLA Car lei sakna cheng nuai 10 chu an titawp ta ngei a. Hetih rual hian Car loan cheng nuai 4 ni thin, hman ngai tawh loh kha tinung thar lehin cheng nuai 15-ah tihpun a ni a, hei pawh hi loan tha mi tho 5.5% p.a. chauha pung a ni.
Kum 5 chhungin Board Chairman hlawh leh AMC/LMC senso atan cheng 6,27,30,000 lawih sen belh a ni ang. Board hrang hrang Chairman leh MYC Chairman thla tin hlawh chu cheng 8000/- atangin cheng 40,000/- ah tihpun a ni a, a punna hi 400% lawih a ni.
Board Chairman leh AMC/LMC hlawh pun avanga sum sen belh hi kum khatah cheng 1,25,46,000/- zet a ni a, kum 5 chhung chuan cheng 6,27,30,000/- a tling ang.
Hetianga sorkar tharin sum siam belhna tur a siam zawng zawngte hi chhut thuak thuakin, kum 5 chhungin cheng nuai 13,415.84/- niin, kum khatah cheng nuai 2,683/- chuang a tling ang.
Heng chauh pawh hi han thlir hian ZPM chhungkaw bil induhsakna leh uchuak taka inhaivurna nasa tak a ni..
ZPM CHHUNGKAW BIL INHAIVURNA NASA TAK A NI
