ZPM chu miretheite lama tang a ni a, an chhanchhuah a ngai tih an party vice president RevDr K Thanzauva chuan a sawi.
Thawhtannia an party office-a inkhawmah ZPM vice president chuan Pathian ram politics chu hmathlir tha tak nei a ni tur a ni a. Tuna kan society kalphung, mi tlemte hamthatna chu mitinte intluktlanna vantlang nunin thlak kan tum tur a ni, tiin a sawi. “Chutiang tur chuan system dik a tul a, a kengkawhtu leh hmangtu mihring dik a ngai a, fel leh taimak a ngai a, mitha kan nih a tul a, ram hruaitu atan mihring rilru tha leh mawi kan nei ngei tur a ni,” a ti.
Pathian ram politics chu retheite lama tan a ni a. Chu chu Lal Isua political manifesto, Nazareth khuaa puanchhuah leh a mission pumpuiah a langchiang tih a sawi. “Kan ramah mi tam tak retheihna khurah an lut a, mi tam tak chu hman atangin vawiin thlengin an la rethei reng a. ZPM hi miretheite lamah tangin anmahni kan thawhchhuah pui a, kan chhanchhuah a ngai a ni,” a ti.
Mimalin hmun engemawzatah ram zau tak tak an neih thin tih tawp a tul thu te, hmasawnna hnathawh leh dan hmanga rorelnaa dik a tul thu te, corruption hnawhchhuah a tul thu te RevDr K Thanzauva hian a sawi a. Pathian ram politics tungding turin hmangaihna leh inngaihtlawmna nen mahni inphatin, mualphona leh tuarna huamin, chumi hmang chauh chuan ram a tho leh thei tih a sawi.
ZPM hi miretheite lamah a tang – RevDr K Thanzauva
![](https://theaizawlpost.org/wp-content/uploads/tap_logo-min-large.jpg)