ZPM hi party-a tlan tau leh
tawnhriat nei lo kalkhawm
– Dr R Lalthangliana
ZPM chu political party hrang hrang atanga tlan tau kalkhawm leh NGO thenkhat awmkhawm, politics-a tawnhriat nei lo an ni tih MNF hruaitu Dr R Lalthangliana chuan a sawi.
Thawhlehni zana Aizawl East II MNF Block intawhkhawm a hmanpuinaah MNF senior vice president Dr R Lalthangliana hian, ZPM chu political party hrang hrang atanga tlan tau kalkhawm leh NGO thenkhat awmkhawm, politics-a tawnhriat nei lo, chief minister leh an minister-te pawh experience nei lo an ni, tiin a sawi. Opposition an nih laiin tha ber tur leh danglam bik em em tur anga an insawi laiin, sawrkarna an chan chuan an rin ang ngawtin thil tih a lo awlsam loa, a harsat zia thu sawiin an beidawng tan, tiin a sawi.
Mipui thinlungah ZPM sawkar enchhin a fuh loh zia a lang mek nia sawiin, “Chhiah chi hrang hrang tipungin, oil man an tisang a, ration buhfai card vara late tan a let thawkin an tipung a. Hengte hian thil man chi hrang hrang a tihsan phah a, mirethei zawkte sum lakluh a pung ve si lo a, khawsak harsa zawkte tan ZPM sawrkar thar kal dan hi phurrit a ni,” a ti.
Sinlung Hills Council atangin Mizoramah politics-a harhtharna a thleng mek tih MNF hruaitu hian a sawi a. VC/LC, AMC leh inthlan hrang hrang kan hmachhawn turah ZPM sawrkara beidawng mekten MNF lam an hawi niin a sawi a ni.
ZPM hi party-a tlan tau leh tawnhriat nei lo kalkhawm – Dr R Lalthangliana
