ZPM Gen. Hqrs hruaitu hlui leh kum 2024-2027 chhung atana hruaitu thlan tharte chuan Ningani khan party office-ah charge an inhlan.
ZPM hian February 15 khan hruaitu an thlang a. President-ah Lalliansawta, vice president-ah W Chhuanawma, MLA leh treasurer-ah Lalchhuanthanga, MLA te thlantlin an ni. ZPM Constitution-in a phal ang leh General Headquarters executive thukhawmin a pawmpui tawh angin vice president atan VL Zaithanzama, MLA leh C Lalnunnema te ruat an ni a, secretary general-ah Er Vanlalneiha Ralte ruat a ni bawk.
ZPM president chuan party mipuiin party kaihhruai hna an kuta an dah chu a ropui hle a, an hmaah chona lian tak a inchhawp chho zut dawn a, hna an ngah dawn hle tih a sawi. Mipuiin sawrkar an siam angin sawrkar chu thawhpui a, tichak zual zel turin theihtawpa tang tlang turin a sawm a. Party hruaitu thlan tharte aiawhin an worker zawng zawng thlawpna leh finchhuahna a ngen nghal tih sawiin, “Hetianga thawhhona tha nena kan kal zel chuan, MP, VC, AMC, LMC leh 2028 MLA inthlanah pawh kan chak zel ka beisei,” a ti.
ZPM hruaituten charge inhlan
