ZPM-in AR Kohhran biak
in ram chhuh luih an tum
– MNF Legal Board
Mizoram Synod ta, Assam Rifles Kohhran biak in ram chu ZPM sawrkarin kawng hrang hrangin chhuh sak a tum mek tih MNF Legal Board chuan an sawi.
MNF Legal Board vice chairman Lalpianfela Chawngthu sawi danin, kumin May 5-a chief minister hoa thukhawm, Assam Rifles chhuahsan ram enkawl zui dan tur ngaihtuahtu thuneitu sang, ‘Advisory Committee’ chuan Assam Rifles Kohhran biak in hmun hi sawrkar kuta a luh theihnan Synod dawrtu tur an inruat a. Biak in hmun, land lease sawrkara hlan tura ZPM sawrkar ngenna chu Synod Executive Committee-ah thlen a ni a. SEC thutkhawmah he biak in hmun hi kum 1950 hmalama Mizoram bawrhsap-in AR-a Mizo awmte inkhawmna tura a lo pek tawh a ni a; he biak in hmun hi AR ram ni loin, ram awl, biak in hmun atana pek a ni tih sawi a nih thu a sawi.
Tun dinhmunah he kohhran hi Assam Rifles tanglaite chauh ni lo, sipai bang leh an chhungte, Aizawl veng hrang hranga awm darhte lawina niin, AR-in an hmun chhuahsan mah se, kohhran hi pangngai takin a la kal a, rauhsan a ni loa, sakhuana serh leh sang engkim kalpui a la ni a. Biak in hmun pek an nih dan zawng zawng ngaihtuahin, sawrkara hlan chu remchang loah SEC hian a ngai tih a sawi a ni.
Hetianga SEC-in zai dawh taka ngaihdan a thlen hi ZPM sawrkar chuan zahsak ahnekin, biak in hmun hi Assam gazette notification leh The Mizoram (Restriction on use of Transferred Land) Act 2002 hnuaia rinluh nia sawiin, kum 2011-a sawrkarin land lease a lo pek pawh felhlel anga a sawi bakah Central YMA in High Court-a PIL a thehluhah he biak in hmun hi a tel ve anga sawiin, ram buai, court-a inchiah mek angin a chhuahsak a, court thutlukna nghak turin Mizoram Synod pawh hriattir nise, a ti zui tih a sawi.
“ZPM sawrkar atanga lehkha an dawn an bawhzuinaah Synod senior executive secretary chuan, Central YMA hnenah kumin October 14 khan lehkha thawnin, High Court-a PIL an thehluhah AR Kohhran biak in hmun ram a tel ve em, tih a zawtfiah a. CYMA general secretary chuan court-a an thu thehluhah AR Kohhran biak in hmun hi a tel ve loh thu a hriattir,” Lalpianfela Chawngthu hian a ti.
ZPM sawrkarin thudik lo nen lam, chhuanlam dapkhawm chawpa kohhran thlenga thupek khauh tak a pek bakah CYMA lehzel thudik loa a puh tel duh tih a sawi a. Party office sakna atan an it a nih chuan tha taka Mizoram Synod dil mai turin thu an rawn tih a sawi.
ZPM-in AR Kohhran biak in ram chhuh luih an tum – MNF Legal Board
