ZPM-in BJP laka an intiamna a tihhlawhtlin loh vangin an hrek – Lal Thanzara

ZPM-in BJP laka an intiamna a
tihhlawhtlin loh vangin an hrek
– Lal Thanzara
ZPM sawrkarin BJP an zawmna leh an laka an thutiam an tih hlawhtlin leh si loh avangin central-a BJP sawrkarin a hrek a. BJP duh anga an awm hma loh chuan engmah an ti thei dawn lo tih Congress president Lal Thanzara chuan a sawi.
Thawhtannia Kolasiba an party mite tana political training neih a hmanpuinaah MPCC president chuan, ZPM sawrkarin BJP an zawmna leh an thu intiam tawn ang an tih hlawhtlin loh avangin BJP sawrkarin a hrek a. Central dawrtu chief minister leh minister-te thil hawn chu thlalak thar an neih belh chauh hi a ni, tiin a sawi. BJP duh anga an awm hma loh chuan engmah an ti thei dawn loa, BJP duh anga an awm hun hunah kohhran rilru an hliam dawn avangin tuilairapin ZPM sawrkar a awm mek tih a sawi bawk.
Sawrkar inthlakah sawrkar hlim local council leh village council inthlanah sawrkar lai belin mi tam takin ruling an bawh thin a. Seat pawh hneh takin an la thin a. ZPM sawrkarah erawh chuan sawrkar laia VC leh LC member, party hruaitu leh member ten nitin ZPM an chhuahsan zawih zawih a. Hetiang hi thil thleng ngai lo, sawrkar laiah mipui leh party miin rinna an neih loh vang leh beiseina an neih loh vang a ni tih a sawi.
“Congress sawrkar laiin Mizoramah thlarau lam hlimna leh harhtharna kan chang a, MNF leh ZPM sawrkarah chuan ramin manganna leh tlakchhamna kan tawk a, mipui an rum a, mipui hnen thleng phak ruahmanna a awm loh avangin sum harsatna namen loin a nasa. Mipui sawrkar tiamtute hian ZPM sawrkara mi tlemte bak a huap lo,” Lal Thanzara hian a ti.
Politics chu rawngbawlna a ni a. Dawt leh mahni inhaivurna tur a ni lo tih sawiin, “Kan party awmnaah hian kan ram, kan hnam, kan sakhua a him em, tih kan ngaihtuah a tul. Congress party hi India zalenna sual chhuaktu, India rama hnam hrang hrang leh sakhaw hrang hrang him taka an awm theihna tura dan siamtu party leh sakhaw zalenna kengtu a ni. Sum thianghlim lo nena lalna changa sakhaw zalenna min palzut saktute nena nghawngkawl inbahtawn hi Kristian-te tan a thiang lo,” a ti bawk.