ZPM chuan ‘culture’ hran an nei a, political party dangte tih thin chu an tih ve kher a ngai lo tih minister Lalthansanga chuan a sawi.
Aizawl East-I huamchhunga local council leh village council ZPM official candidate leh party hruaitute chu Nilaini khan an intuaithar a. Hmanpuitu bialtu MLA Lalthansanga chuan, kalphung thar sawrkar hnuaiah mipuiin rilru thar nen politics an thlir a. ZPM-in sawrkarna a siam hian mipuiin sawrkarah beiseina sang tak an nei a, chumi tihlawhtling tur chuan an hruaituten hna an thawk tih a sawi. Tun thlengin Pathian khawngaihna zarah eiruknaah an hruaitute an la hminghliau loa, a lawmawm hle tih a sawi bawk.
“Thawhrimna zawng zawngah hian hlawhtlinna a awm tih hria ila, kan candidate-te Pathian chakna ring chungin, thawhrimna leh rinawmna hmachuanin inthlan hmachhawn turin kan inchah a ni. ZPM hian culture hran kan nei a, party dangte tih thin hi kan tih ve kher a ngai lo. Mipuiin kan lakah beiseina sang tak neiin min thlangtling a, mipui kan tibeidawng ve thiang loa, rinawmna leh thawhrimna nen ram a siamthat theih tih hi mipui thinlungah kan tuh nawn dawn a ni,” a ti.
Hun rei tak chhung chu politics kalphung tha lo takin mipui min kaihruai a, chumi laka zalenna dar vaw tur chuan ZPM-in hma an la a, lehlam pawlte laka phuba lak duhna rilru a lo bo theihnan leh ram rorelnaah Pathian ram a din theihnan hma an la mek tih minister hian a sawi. Health care chungchangah, electric bill leh thildang tam takah ‘change’ an thlentir a, hmasawnna hmel thar an hmu chho zel tih a sawi.
“Sawrkar laipui atanga sum tam tak sawi chhuah ringawt hi a ni ber loa, a hmanna tur mumal tak kan ruahman a ngai. Hmasawnna hnathawhte campaign-na atan hmang loin, ramin a mamawh ang zelin kan thawk dawn a ni. Thudik ziktluak lo hmanga inbeih hi sim a tha a, mipui rilru hruaikawi thei thil thehdarh kawngah pawh kan fimkhur a ngai,” a ti.
ZPM-in culture hran kan nei – Lalthansanga
