ZPM-in intuam dam tum mek Treasurer-in insawifiah turin party hriattir

ZPM-in harsatna an tawk mek a, an party chhungkuaah khi a awm; hei hi tuam dam an tum a, an intuam dam lo a nih chuan nghawng lian nei thei khawp a ni tih thu dawn a ni. An party treasurer-in insawifiah turin party a hriattir a, party hi an insawifiah tawh em tih hriat a ni rih lo. An general secretary (GS) rualin thil kar an nei mek bawk.
Thu dawn danin, June thla tir lamah khan ZPM treasurer C Laltanpuia’n party-ah lehkha a thehlut a, thil sawifiah tura tiin, June ni 15 thleng a nghah tur thu a ziak.
Party hi an insawifiah lo a nih chuan June ni 20-ah press conference a koh tur thu a ziak a, mahse June ni 20-ah hian press conference a ko ta lo. Party hruaitute’n thil awmzia an sawi vang a ni em tih te, chhanna a duh ang a hmuh vang a ni em tih te erawh hriat a ni lo.
ZPM treasurer hian a lehkhaah hian point pali a ziak lang a, nomination committee-a a tel loh chhan leh bial vil tura ruat a nih loh chhan te a tel tih thu dawn a ni.
An party dan bu-ah nomination committee-ah hian elected office bearer-te chu tel sa an ni tih an ziak a, mahse vice president pahnih Lalthansanga leh Rev Dr K Thanzauva, treasurer C Laltanpuia te telh an ni lo. Elected office bearer pathum an tel loh laiin working president, leader leh MLA pakhat te an tel thung. Nomination committee hian bial viltu tur mi 35 an ruat hnuah June ni 12 khan candidate tur mi pakua an ruat fel.
ZPM treasurer hian nomination committee-a a tel loh bakah bial vil tura ruat zingah a tel lo a, chu chu a chhan a zawt tih thu dawn a ni.
ZPM general headquarters-a general secretary (GS) rualin thil kar an nei mek bawk a, party thiltihah an duh dan ni lova thiltih a awm avangin, hemi chungchangah party hruaitute nen an inbe mek tih thu dawn a ni.
GS rualin eng nge an duh tih hi hriat a ni lo a, mahse lungawi lo thei dinhmunah an ding. Thawhlehni khan a huhovin an party president an hmu a ni.
Thudawn pakhatah chuan GS rual hi an lungrual thap lo telh telh a, GS thenkhat chu an nihna hlihsak an ni. Nihna dang an pek erawh a rinawm tih thu dawn a ni.