ZPM-in lawmthu an sawi

AMC Ward No. XIX by election neih zawh takah an party candidate-in hnehna a chan avangin an lawm hle tih ZPM party chuan an sawi.
ZPM Gen. Hqrs. thuchhuak chuan, an party-in mipui duhsakna an dawng chho zel a, an dilna leh sawmna chhanga an vote hlu tak petu Ward XIX mipui chungah lawmthu a sawi tih sawiin, an candidate Dr C Malsawmtluangi thawhrimna fakawm an ti a, thlantlin a nih theihna tura campaign laia rim tak leh thahnemngai taka thawktute chungah an lawm takzet tih a sawi a ni.
Inthlan kaihnawiha a kul ataia thawktu sawrkar lama thawktute chungah an lawm tih a sawi a. Inthlan thianghlim tak hnuaia AMC corporator thar neih a ni ta chu an lawm hle tih a sawi. An thawhpui party dangte atanga duhsakna leh lawmpuina an dawn chu hlu an tih thu a sawi bawk.
ZPM Gen. Hqrs. bakah hian ZPM Zonu Hqrs. leh ZPM Hqrs. Upa Committee chuan lawmthu sawina thuchhuah an siam a ni.