Kum upa ten sawrkar atanga chhawmdawlna an lak thin – old age pension chu ZPM an sawrkar chuan state-in a tum ve tur chu an tipung dawn tih MLA C Lalsawivunga chuan a sawi.
Bethlehem leh Bethlehem Vengthlanga Mizoram Upa Pawl-in Upate Ni denchhena hun an hman a hmanpuinaah Aizawl South-I bialtu MLA C Lalsawivunga chuan sawrkar laipuiin kum lama upate a ngaipawimawh hle a, chhawmdawl nan pawh old age pension scheme a kalpui a, chu chu kan state sawrkarin Rs. 50-100 velin a lo puibawm ve a, a beitham hle, tia sawiin, “Chu pawh a hun takah kan dawng thei thin loa, Pathian leh mipui zarah ZPM a sawrkar chuan old age pension hi budget atangin Rs. 1000 in kan tipung dawn,” a ti.
Tunlaia min tibuaitu ruihhlo zuar leh titute chu chhungkua atanga seilian vek an nih bakah eirukna pawh chhungkua atanga seiliante atanga chhuak tho a ni tih MLA hian sawiin, “Kan tu leh fa, khawtlang leh ram siamthatna kawngah Kristian chhungkua atanga siamtha a, bul tan thar leh turin nu leh pa, pi leh pu, upa pawl member-te ka sawm a ni,” a ti.
ZPM-in upa pension tihsan tum
