ZPM leh HPC thawkdun dawn

Zoram Peoples’ Movement party leh Hmar People Convention party chuan inthlana thawkdun turin Thawhlehni khan thawhhona thuthlung an ziak.
Thawhlehni khan HPC Hqrs. awmna Sakawrdaiah thawhhona thuthlung hi an ziak a. HPC general secretary leh Sinlung Hills Council member Lalremruata Varte chuan thawhhona chungchang a sawifiah a. ZPM aiawhin vice president Dr Kenneth Chawngliana leh HPC aiawhin president Rohringa ten hming an ziahhnan a ni.
ZPM vice president chuan HPC hi party dang nen an lo thawk ho tawh thin a, bawhzui erawh a ni ngai lo tih sawiin, “ZPM-in kan ziahpui ve ta che u a, kalphung thar mipui sawrkar din turin hma kan la mek a, kan policy tihhlawhtling turin kan sawm che u a, kalphung hlui ang mai maia ti loin, tihlawhtling ngei turin hma kan la dawn a ni,” a ti. Zoram hmun hrang hranga hmar mipui aiawhin he thuthlung hi an ziak tih a sawi.
HPC president chuan HPC-in a lo thawhpui tawhten an ngaihsak zui ngai loa, hun rei tak chhung chu an mi leh sa thenkhatte an rammu hial tih a sawi. Tharum thawhna chuan thil tha a chhuah thei si loh bakah mipui mimir, nunau leh naupang an thlabar em em reng a, kohhran pawhin hma a sawn thei loa, mi tlawmngai leh thahnemngaite hmalakna azarah ralmuang takin hun an hmang thei ta tih a sawi. Chutihrualin hmar bial hian ensan a hlawh laklawh a, hmasawnna in a zuankan bik emaw tih turin hmasawnna a takin an hmu ve thei lo tih sawiin, “He thawhhona ziah hian a tak ram, a thlen theih nan theihtawpin kan theihna kan hman a ngai a ni,” a ti.