Bial huamchhunga local council leh tlawmngai pawl hlun sa te kalkanin ZPM MLA Dr Vanlalthlana’n pawl dinchawp hmangin a MLA Fund-in duhsak zawngte a vulh, tih MNF party chuan an sawi.
MNF Media & Publicity hruaitute chuan Aizawl North-II bialah local council 9 a awm a, an veng theuh an enkawl bakah tlawmngai pawl rinrawla – YMA, MHIP, MUP leh Sporting Club te vengtinah chak takin an ding theuh a. Heng pawlte hi MLA fund pek theih sawrkar pawmpui vek niin, pawl rintlak, sawrkar pawmpui pawl vengtina an awm lai leh local council tha tak tak an awm laiin, bialtu MLA hian ‘Aizawl North Development Society’ a din chawp a. Chu pawl hmang chuan a biala hmasawnna hna zawng zawng deuhthaw a thawhtir niin an sawi. Agency dik leh rintlak tam tak an awm laia pawl dinchawp deuh vek a hmang chu local council-te leh tlawmngai pawlte zahlohnaah an ngai tih an sawi a ni.
2023 February 16 khan YMA Ramhlun South ‘Y Section’ chuan thuchhuah siamin, ZPM Ramhlun South Unit III chuan vengchhung hmasawnna’na MLA fund Rs 250000 an hmuh chu Y Section in sak mek sak chhunzawmna’n an hlan a. He sum atang hian Rs 30000 (12%) chu ZPM Ramhlun South Unit III hnenah YMA Ramhlun South Branch Y-Section hian lawmthu sawina atan hlanlet a ni, tih a tarlan thu an sawi a.
‘YMA Ramhlun South Branch Y-Section thuchhuah hi thudik tak a ni a, thuchhuah atanga a lan danah ZPM Ramhlun South Unit III hian MLA fund an dawng tih a chiang hle. Party unit hnena MLA Fund pek hi danin a phal loa, ZPM Unit-in YMA in sakna atanga 12% (Rs 30000) an la duh hi a mak hle. Party mite hleihluak taka duhsak duh vanga dan phal loh thleng thlenga thil ti duh ZPM MLA chet dan hi, an thusawi thin dan nen a inmil lo hle a. An sawrkar lo chung pawha dan bawhchhe khawpa uchhuaka party mite duhsak duh hian, khawi lamah mah mipui sawrkar an din loang tih a chiang,’ an ti.
MLA fund hmanna atan agency dik leh rintlak tam tak an awm lai a, an party bil invulh theihna’na agency a dinchawp duh chu mak an tih thu MNF general secretary VL Krosshnehzova chuan sawiin, “Agency dinchawp hmanga an hnathawh hlawkna hi ZPM party bil mi tlemte leh an MLA hian an pumbilh a. Hetianga khawtlang leh tlawmngai pawl pawh zah zo loa, an agency dinchawp hmanga an invulh duh hian ZPM zia dik tak a pholang chiang hle,” a ti.
ZPM MLA-in dinchawp agency in MLA Fund hmang thin – MNF
