- Rev Dr K Thanzauva
ZPM MLA-te corruption
ah an la fihlimin ka hria
- Rev Dr K Thanzauva
ZPM sawrkara minister /MLA te chu inthlan hmaa an intiam angin tun thlengin corruption-ah an la fihlim nia a hriat thu ZPM consultant Rev Dr K Thanzauva chuan a sawi.
Thawhtannia an party office-a inkhawmah ZPM consultant chuan, ZPM an sawrkar theih chhan pawimawh tak chu, corruption an ti ve dawn lo, tih kha a ni, tiin, “Kan MLA candidate-ten Pathian hmaah an intiam a, vawiin thlengin an la fihlimin ka hria. Eirute chu CBI, ACB, Lokayukta ten man loin court-ah thiam chang mah se, an asset neih zat kan hria a, mipui rilruah thiam an chang chuang lo. Tuna kan ram hruaitute hi term tawp thlengin rinawm zel ula, kan thlangtling leh ang che u,” a ti.
Zofaten ruih kan bang thei lo tih Rev Dr K Thanzauva hian a sawi. “Kristian kan nih hmain zu kan rui a, Kristian kan ni a, sakhua kan rui leh a. Politics a lo lut a, politics kan rui a, drugs a lo lut a, drugs kan rui leh suau suau a. Chumi hnuah information technology a lo thleng a, social media leh cellphone kan rui leh a ni,” a ti.
Mizoramah hian ruihhlo ngaite enkawlna home leh center hrang hrang kan ngah hle a; enkawl an nih lai chuan an sim thei a, an lo chhuak a, reilote hnuah ruihhlo bawihah an tang leh thin tih ZPM hruaitu hian a sawi. Tunah erawh sawrkar, kohhran leh tlawmngai pawl hmalaknain hma thar lak a ni a. Hulhliap Short Stay Center-ah an taksa, rilru leh thlarau lamah an hrual hnuin thiamthil an neihna turin an la umzui zel dawn a. Heng hi sawrkar hmalakna kan la hriat ngai loh thil a ni, tiin a sawi.