Zoram People’s Movement chuan an party president atan chief minister Lalduhoma an ruat a. President thar hian an party chhung thu ti leak out thin chu an chhui zel tawh dawn a, chu’ng mite chu an party-ah an la awm zel duh a nih pawhin primary member aia sang chanvo an chang dawn lo tih a sawi lawk.
Thawhtanni khan ZPM Val Upa Council (VUC) chuan an party hruaitu atana an ruat thar ho an puang a. President-ah Lalduhoma, senior vice president – Dr Kenneth Chawngliana, vice president Lalmuanpuia Punte, treasurer T Lalhlimpuia an ni.
Hruaitu thar ruat chungchangah VUC member Maj. Thanruma chuan, VUC-in uluk taka ngaihtuahna an sen hnuah party hruaitu thar an ruat tih a sawi a. Rorel lai party tana tha tur ngaihtuah chung leh ram pum huap thil ngaihtuah chungin hruaitu thar an ruat tih sawiin, “Ram hruaitute chu Pathian hriak thih an nih avangin a pawng a puia do ngawt chi an ni loa, theihtawpa puih tur zawk an ni. Hruaitu nihna hi hmansual tur a ni loa, chapopui chi a ni hek lo; a hunah Pathian a che mai thin,” a ti.
ZPM president thar Lalduhoma chuan, hruaitu thar ruat chungchangah Pathian an rawn nasa a, mi tam takin an tawngtaipui a, hruaitu thar ruatte chu VUC kaltlanga tawngtai chhannaah an ngai tih a sawi. ZPM chu Mizorama political party zingah Val Upa Council nei awmchhun a ni a, a pawimawh hunah an rawn lang thin a, tun dinhmunah an an chhawr tangkai hle tih a sawi. Chief minister ruattu an ni a, inthlan hma fe atangin CM tur an ruat lawk a, inthlan fel tawh hnuah ruat ni chauh se, House leader tur inchuhna leh thil dangah harsatna thleng thei a ni a, hetiang buaina awm thei hi ZPM chuan an nei ve lo tih a sawi a ni.
Thuruk tih leak out ching, whatspp group-a thu tute emaw rawlruk ching an awm a, hetiang hi pawl tin tan mi hnawksak an ni tih a sawi a. An party pawh an thuruk leak out fo chu chhuichhuah an duh theuh angin, an party group bak, thian group leh group danga an awmnaah ro hran va rawt pui a, information pek ruk ching an awm leh awm loh thlengin an fimkhur tawh dawn tih a sawi.
“Kan thu a leak out leh a nih chuan kan chuichhuak dawn lutuk a, hetiang tih ching chuan kan party-ah a duh chuan primary member a ni thei ang, a aia chanvo sang a chelh thiang loang,” a ti.
Khawvel chu a danglam reng a, Pathian meuh pawhin thuthlung a thlak fo thin a; thuthlung hlui hun leh thuthlung thar hun a awm bakah Lal Isua pawhin ngaihdan a thlak fo tih Lalduhoma hian a sawi. Tunhma chuan sa kap thei an ngaisangin an ngaihlu thin a, tunah erawh dan bawhchhiatna a ni tawh a. Tunhma chuan birth control (family planning) an thupui a, tunah erawh pian pun kan thupui leh mek tithe a sawi.
“Socialism buaipui hunlai, independent sual duh hunlai pawh a awm. Mah se, a hnuah chuan India nena inremna daltu nia an ngaihte chu an hmelmate an ni leh a. Heng thil hi demna tur a awm loa, a hunlai mil ang zela ngaihdan leh ngaihtuahna sen a ngai thin,” a ti.
Hun inher mil zelin ZPM pawh an inthlak danglam chho a, chief minister leh party president chelh kawp tha an ti loa, hun engemawchen an kalpui hman a. Tunah erawh an thatna tur zawk nia hriain party thuneitu sang kalkhawm chuan chief minister leh party president nihna chelh kawp chu tha zawk dawnin a hre leh ta tih sawiin, “Tuna kan kalphung thar tur hi kan enchhin dawn a, a that loh chuan a tha zawk hmangin kan kal leh mai dawn a ni,” ZPM hruaitu hian a ti.
ZPM president-ah Lalduhoma ruat “Thu ti leak out thin kan chhui ang”
