Chief minister Lalduhoma’n hun engemaw chhung ZPM president charge a lak hnuah ZPM president Lalliansawta’n June ni 18 atangin charge a la let leh dawn.
ZPM president hian June ni 17 khan office order a chhuah a, “Date 18.06.2026 (Thursday) atang hian Pathian khawngaihna azarah president charge chu ka lo la leh leh thei ta a, chutih rual erawh chuan meeting kaihhruai leh tul dangah a tul ang anga min pui chhunzawm turin Pu Lalduhoma, Leader ZPM Legislature Party hi Ex-Officio EOB a nih angin ka ngen nghal bawk e,” tiin a ziak.
ZPM president hian a hriselna lamah harsatna a tawh avangin April ni 22 khan chief minister Lalduhoma kutah charge a hlan a, politics-ah titi a siam hle.
ZPM-a an roreltu pawl pakhat Val Upa Council-in hei hi an pawm lo a, hemi chungchanga an ngaihdan hi president hnenah ziakin an thlen nghe nghe. President pawhin ziakin a chhang a, mahse Val Upa Council hian May ni 18-a an thutkhawmin, chief minister kuta charge hlan hi tha an tih loh thu an an pass a, “… hetiang hi thleng tawh lo se kan ti,” tiin thu an dah a ni. Chumi hnu thla khat vel hnuah president chuan charge a la let leh ta a ni.
ZPM president-in charge la leh dawn ta
