ZPM-in Rajya Sabha MP candidate atana an ruatin a sawi dan atangin he inthlan turah an party MLA-te ngaihdan a inang lo nia an nagih thu MNF Rajya Sabha MP candidate election agent chuan a sawi.
MNF RS MP election agent Eva Tochhawng chuan, ZPM-in Rajya Sabha MP atana an candidate-in TV interview-a ‘cross voting’ awm thei lo leh party MLA-ten party official candidate an vote loh chuan an vote thi tur anga sawiin, thudik lo a sawi tih a sawi a. Danin a sawi ang tak Mizoram mipui hrilhhriat a tul a, ZPM candidate an sawichhiat hrim hrim lam niloin, thudik zawk sawifiah a tul tih a sawi.
India Danpui Article 80-naah, Rajya Sabha-a state tin aiawh tur chu an State Legislative Assembly member-ten an thlang a. MLA-te chu an party candidate-te vote tura beisei an ni thin tih a sawi a ni.
1998 June-a Maharashtra-a Rajya Sabha inthlanah cross-voting a awm tan a. MLA-ten cross-voting an tih lohnan kum 2003-ah Representation of the Peoples Act 1951 siamthat niin, Rajya Sabha inthlana vote thlak dan chu ‘open ballot’ hmanga tih tawh tur a ni ta a. He dan thar awm hnuah hian The Conduct of Election Rules 1961-ah pawh Rule 39AA siam belh leh niin, chutah chuan party-ten Rajya Sabha MP inthlanah authorised agent pahnih an ruat thei a. MLA-te chuan an duh duh an vote thian rualin, an party authorized agent-te vote an hmuhtir phal tur a ni a, an phal lo emaw midang an hmuhtir emaw a nih chuan an vote a thi thei zawk a. Independent MLA-te erawhin an vote tumah an hmuh tir tur a ni lo thung tih a sawi.
India Danpui siamthat vawi 52-na chuan kum 1985-ah Tenth Schedule hmangin anti-defection law a tichhuak a. He Schedule hian Parliament emaw State Legislature member-te chu an political party member nihna an bansan emaw, an party thupek kalhin House-ah vote an thlak emaw chuan House atanga ban theih an ni tih a tarlang a. Ni mah se, Rajya Sabha inthlan hi dan chuan Legislative Assembly chhunga thil thleng angin a ngai lo tih a sawi bawk.
‘Open ballot’ dana Supreme Court thutlukna siamah chuan, ‘open ballot system’ hian Danpui a kalh lo, tiin he thubuai hi a hnawl a. He case vek hian, “Rajya Sabha inthlan hi Legislative Assembly ‘House proceeding’ a ni loa, chuvangin he inthlanah hian Anti-Defection Law – 10th Schedule a hman ve theih loh” a ti bawk a. Election Commission of India chuan kum 2017 khan thuchhuah siamin, “Party thupek bawhchhiaa a vote thlak chungchangah Anti-Defection Law – 10th Schedule dan hi Rajya Sabha inthlanah hman a ni dawn lo” tih a lo tarlang tawh thu Eva Tochhawng hian a sawi.
“Tunhma kha chuan ruling party candidate kha tling sa tura ngaih a ni mai thin a. Tunah hetiang thu sawi a ngai ta hian ruling /ZPM party MLA zingah ngaihdan /duhdan hrang a awm a ni tih a lantir niin kan ngai,” a ti.
ZPM RS MP candidate thusawi danah ruling MLA ngaihdan a hrangah ngai
