ZPM sawrkar ruahmanna siam a ziktluak a awm lo – Lalnunmawia Chuaungo

ZPM sawrkar ruahmanna
siam a ziktluak a awm lo
– Lalnunmawia Chuaungo
ZPM sawrkarin ruahmanna an siam reng reng ziktluak a awm lo a. Thlai thar lei ruahmanna a ziktluak loa, healthcare pawh paper-ah chuan tha mah se, a ziktluak lo tih Congress hruaitu Lalnunmawia Chuaungo chuan a sawi.
Zirtawpnia Congress Bhavan-a inkhawmah MPCC senior vice president Lalnunmawia Chuaungo chuan, sawhthing an lei dan tur an sawi a, party dangin an lei zat tur an sawi lawk ve si loa, Congress mi leh sa ngei pawhin an party chhuahsan chuang loin ZPM an vote phah tih a sawi.
Thlai thar leina atana cheng vaibelchhe 110 an ‘dah’ chu loneitute kutah engmah a lut lo nia sawiin, 2024- 2005 kum a zoa, enga lawi tih an nei loa, kum 2025-ah phei chuan thlai thar leina tur dah bik an nei lo tih a sawi bawk.
Kuminah hmunphiah lei season-ah a leitu tur empanelled firm 8 an dah zinga 5 chauhin an leisak a. Grade ‘A’ Rs.100, Grade ‘B’ Rs 80-a leisak an tiam angin an leisak leh chuang lo tih a sawi.
“Hmunphiah quintal 10900 vel awrh an leisak a, an leisakna tam ber chu Rs.80 tling lo a ni. ZPM sawrkarah hmuhphiah grade ‘A’ thar an awm ta lo hrim hrim a, grade ‘B’ pawh tling lo a ni ta deuh vek zawk. Kg ah Rs 60-80 in empanelled firm-ten an leisak a ni,” a ti.
Sawrkar document-a a lan danin, chhungkua 25327-in ram acre 405.50 velah sawhthing an ling a. A chia an lin zat hi quintal 169395 a ni tih Lalnunmawia Chuaungo chuan a sawi.
“Mizorama sawhthing thar tur hi qtls 1483253 niin sawrkarin a chhut a; June thleng kan lei ang an ti a, May 20-ah pawh quintal nuai khat an lei tling awrh chauh. Mi tam takin cho ngam loin an la phum mai mai a ni. May 20 thlenga sawrkarin a leisak chu qtls 114622 a ni a, kuthnathawktuten a chia an lin zat pawh an la leisak lo,” a ti.
Chutiang khawp chuan ZPM sawrkarin mipui an sawp nasa a, mipui hamthatna tur atan niloin, mahni hamthatna atana mipui hmanruaa hman an tum tih MPCC hruaitu hian a sawi.
“Congress-in sawrkar kan duh a, chumi tur chuan hma kan la mek. Keimahni tan niloin, kan zavaia hmasawnna tur, mipui nawlpuiin ngaihpawimawh hmasak ber an hlawhna sawrkar din turin theihtawp kan chhuah ang,” a ti.