ZPM an sawrkar chuan an sawrkar tuk atanga an hna hmasa ber chu corruption do a ni a, MLA leh minister an corrupt ve thiang lo, tih MLA Lalchhuanthanga chuan a sawi.
Salem Veng Local Council by-election neih tur chu August 4 zan khan khuhhawn a ni a. Aizawl West II MLA biala ZPM candidate Lalnghinglova Hmar chuan a khuhhawng.
He huna thusawitu Aizawl South II bialtu MLA Lalchhuanthanga chuan ZPM a sawrkar chuan kalphung tharin a kal dawn a, chutah chuan a takin corruption an do dawn tih a sawi. “ZPM kan sawrkar a nih chuan kan sawrkar tuk atanga kan hna hmasa ber chu corruption do a ni a, MLA leh minister an corrupt ve thiang lo. Corruption kan do tlat chuan kan hna chanve zo tluk kan ni ang,” a ti. ZPM candidate-te chu campaign-naah pawh corrupt ve lo tura intiam chunga campaign ngam an ni tih a sawi.
2023 MLA inthlan awm tur thlirin Aizawl South II MLA chuan, MNF nen an final dawn a; chutihlaiin Congress chuan ruling party bei loin ZPM hlir an bei thung niin a sawi. “Tuna sawrkar corruption nasa tak sawi duh loin ZPM min bei char char a. Kan leader, kan chief ministerial candidate nasa takin an bei. An beih chhan chu Congress hian MNF hi chak tir an duh a, MNF an chak chuan 2028-ah Congress tan chance a awm ve thei ang tih an beisei vang a ni,” a ti. Congress chu mahni opposition pui beih chu thupui bera neiah a puh.
AMC corporator Malsawmzuala pawhin local council inthlan tura pawimawh chu taimakna leh thawhrimna a ni, tiin, hlawhchham thiang an ni lo tih chu hawnpui theuh turin a chah.
ZPM sawrkarah MLA/minister an corrupt ve thiang lo – Lalchhuanthanga
