ZPM sawrkarin ADC a ngaih thah
– Lalruatkima
Sawrkar hmasaten Autonomous District Council atangin duhsak takin MLA tlingte chu national flag tar pha in nihna an pe thin a, ZPM sawrkar chuan ADC pathuma an MLA neihchhun chu hetiang dinhmun hi a luahtir ve loa, ADC an ngaih pawimawh loh zia a lang tih MNF hruaitu Lalruatkima chuan a sawi.
Thuthar thehdarhtute a kawmnaah MNF treasurer Lalruatkima chuan, Pu Lal Thanhawla sawrkar hunlaiin India flag tar theiin ministry-ah ADC mite dinhmun pawimawh takah a dah thin a. Pu Zoramthanga sawrkarah pawh ministry-ah dahin, India flag tar thei dinhmunah dah an ni a. Pu Lalduhoma kaihhruaiah chuan ADC pathum atanga ZPM MLA tling awmchhun Dr Lorrain Lalpekliana Chinzah chu ministry-ah dinhmun tha luah tir a ni lo tih a sawi.
“Hei hian Lai District Council mai ni lo ADC an ngaih pawimawh loh zia a tichiang a. ZPM ministry-ah ADC atangin minister-a dah an ni ve lo hi, LADC inthlanah pawh Lai mipui tan anmahni duhsak lotu vote hi an ba lo,” a ti.
Dampa biala an in-set hlum ang bawkin LADC inthlan turah ZPM candidate an in-set hlum leh niin a sawi a. Candidate an puang chu lawm avanga authawm aiin thinrim inhrosa thawm a ring zawk a. Independent-in an indinthuah thliah thluah a, ZPM member an bang nasa em em bawk tih a sawi.
Lai District ZPM president leh Lawngtlai East bialtu MLA an inngeih loh zia a puak keh a, hmun tinah ZPM a khi a, an lungrual lo. 2028 inthlanpuia ZPM MLA candidate inchuhna a langchhuak tan der a. Dr Lorrain Lalpekliana Chinzah pawl leh Elinery Lianhlawng pawl an inbei nasa hle tih election campaign-ah a lang,” Lalruatkima hian a ti.
LADC term hmasa lamah mi nghet lote avangin sawrkar a inthlak ngun hle tih a sawi a. Khatiang thil a thleng kha a thlen nawn tawh lohna turin MNF chuan sawrkar nghelnghet leh langtlang din a nih theihnan tan a la a, an inbuatsaih tih a sawi bawk.
ZPM sawrkarin ADC a ngaih thah – Lalruatkima
