Natna inkai theih loh vanga boralah mipa tam zawk Nikum April atanga kumin January thlengin Mizoramah zu kaihhnawih natna avangin mi 438-in nunna an chan tih House-ah sawi a ni.
Budget Session neih mekah ziaka chhan chi zawhna, South Tuipui bialtu Jeje Lalpekhlua zawhna chhangin health minister Lalrinpuii’n nikum April atanga kumin January thlengin Mizoramah zu kaihhnawih natna vangin mipa 361 leh hmeichhia 77 te’n nunna an chan tih a sawi.
Zu khapna dan Mizoram Liquor (Prohibition) Act hi 2019-a hman tan a ni a, health minister chuan zu kaihhnawih vanga thihna hi 2023 April atanga vawn a nih thu a sawi.
Health minister hian Siaha bialtu Dr K Beichhua zawhna, ziaka chhan chi chhangin natna inkai chhawn theih loh natna vanga boral zat a sawi bawk a, hmeichhia aiin mipa an tam.
Health minister sawi danin, 2022-23 chhung khan natna inkai chhawn theih loh natna (non communicable disease) vangin Mizoramah mi 756 an boral a ni.
Natna inkai chhawn theih loh vanga boral zat
Cancer
Mipa – 227
Hmeichhia – 147
Cerebrovascular disease
Mipa – 122
Hmeichhia – 64
Hypertensive disease
Mipa – 76
Hmeichhia – 35
Ischaemic heart
disease
Mipa – 67
Hmeichhia – 18