Ruihtheih thil leh dan bawhchhiatna sawrkarin a hmachhawn dan turah zu leh ruihhlo vanga chhungkua leh khawtlanga buaina siam chingte thlengin sawrkar chuan a umzui zel dawn tih chief minister Lalduhoma chuan a sawi.
Nilainia Mizoram People’s Forum Gen. Hqrs hruaitute nen an inkawmnaah chief minister chuan he thu hi a sawi a. Ruihhlo, kuhva ro leh dan loa bungraw tawlhruk awm thin chu tihtawp hmiah tumin an bei dawn tih a sawi bawk.
Sawrkar tha, langtlang leh eirukna awm lo din tura hmalakna an kalpui tan tawh leh hmachhawp an neih a sawi a. MPF chu inthlan thianghlim a awm theihna lamah chauh niloin, sawrkar thianghlim leh langtlang a awm theih nana an thahnemngaihna hrilhhria a, inthlahrung loa sawrkar enzui zel turin a sawm.
Sawrkar chuan Project Monitoring Committee chak tak a siam dawn a, chutah chuan recognised party zawng zawng aiawh bakah MPF, MKHC leh NGO aiawhte an tel dawn a. A tul angin thiamna bik neite pawh an awm dawn tih Lalduhoma hian a sawi. “He Committee hi state level atanga village level thlengin din a ni dawn a. Committee remtihna lo chuan contract hnathawh hun pawhsei, contract man ennawn (revised) a theih tawh dawn loh,” a ti. Hei bakah hian Mizoramin a la neih ngai loh investment policy an duan mek thu leh chumi hmanga foreign company lian tak tak hip luh an tum dan pawh a lo hrilh a ni.
MPF general secretary Rev. Lalramliana Pachuau chuan MPF-in sawrkar laka an beisei ber chu sawrkar tha, langtlang leh eirukna awm lo sawrkar neih a ni a. Chu’ng thil chu a hnena thlen turin an rawn kal tih chief minister hi hrilhin, an theihtawpin sawrkar an thlawp zel dawn a, hun reilote chhungin a tha zawnga thil inthlak hmuh tur a awm tih sawiin, an lawmin an phur hle tih a sawi.
MPF hruaitu dangte pawhin chief minister thar an lawmpuina leh sawrkar tharin hma la se an duhna thenkhat an sawi a ni.
Zu leh ruihhlo vanga buaina siam chingte sawrkarin a umzui dawn – CM
