Rev. Dr. Zaichhâwna Hlâwndo
Kar hmasa khan PLRS leh ZU tih hmangin kan ziak tawh a. Tun tum chu Zu Nge Kan Buaipui Dawn Pathian Lal Ram? tih hmangin kan ziak ve thung dawn a ni. A hun lai a ni bawk a, chanchinbu hrang hrangah Zu chungchâng thu ziak hmuh tur a awm a. Kar hmasa Inrinni khan Vanglaini chanchinbuah duham leh tawngkam u chûak tak hmanga Zu avanga Pathian nung Kohhran sawichhiatna “Kohhran hi Mizo mipui min suattu a ni, Zu tha zawrh a hun’ tih khan min deng na hle. Kohhran hian Zu leh Zu ruite hi ngaihtuah lovin tawngtai sak lo sela eng ang din hmun takah nge kan din ang? tih hi ngaihtuah thui ngam pawh a nilo. Chawlhni 6/3/2025 ah Zalen chanchinbuah Zu fakna ‘Zu hi a tha asin!’ tih a lo chhuak leh bawk. Setana hian zalen a inti ta viau pawh a ni mahna. Zu, Setanan ringtute min beihna atana a hman avanga thihna rapthlak tak tuar te, chhungkaw kehchhia te, zu bawiha la tâng mêk te, nun beidawng ngawih ngawihte’n engtin lo ngaive maw?
Kan ram politician, kohhran hruaitu, mithiam leh mifing tak tak te zawhna ka zawh duh chu – Zu avanga kan buaina chinfelna tha ber hi enge ni a kan hriat? Zalen taka zu zawrh hi kan dam pui kan ring tak tak em? Zu in an tlem sawt ang nge an pung zawk ang? Zu chhiah hmanga sum tam tak siam hi kan ram leh hnam leh chhungkuain kan din chhuahpui ang nge kan chhiatpui ang? Zalen taka Zu zawrh avanga ram leh hnam ropui taka ding chhuak sawi tur kan hria em? Zu in leh ruih ching chhungkua, Pathian tih mi, chhungkaw zahawm leh chhungkaw nuam, in ngeih leh hlawhtling tak sawi tur kan hria em?
Zu hi engatinge heti taka kan buaipui a ngaih? Engatinge kan thih pui nasat êm êm? Engatinge nupa nun, chhungkaw nun leh khawtlang nun a tih buai? A chhanna chu Zu kan khap vang ni lovin Zu in duh leh Zu ruih ching kan tam vang a ni. Zu hian min tibuai lo sela Kohhran leh khawtlangin buaipui a khap a ngai lovang. Engatinge zu ruih kan chak êm êm kan tih chuan Pathian thu kan awih lova Setana Tuibur hmanga nun hlimna kan zawn vang a ni. Zu sawimawiho pawh hi a tlangpui chuan Pathian Thlarau Thianghlim pawlna a hlimna ni lo tisa thila hlimna zawng duh an ni tlângpui.
Mi tam tak chuan Zu hi khap mah ila kan khap rem lovang, khawvel awm chhungin a awm tho tho ang an ti. An sawi dik maithei, kan khap avanga a rem vek loh avanga zalen taka zawrh kan thatpuina chhan tur a awm chuan ka ring lo. Bible chuan sual thlah zalen turin min zirtir lova, do tlat turin min kawhhmuh zawk a ni. Kan ram hruaituten kut hnathawktute thil thar Zua chan tir hi kan thatpuiin kan din chhuahpui zawk dawn an ti niin ka lo hria. Zu in lovin zu an rui ngai lo a, zu ngawl an vei ngai lo. Eng zu pawh alcohol percent a tlem emaw tam emaw zu vek a ni. Kei nin Zu in duh lo hnam, Zu awmlohna ram Lalpa Pathianin min din sak tur kan beisei laiin thenkhatin Zu hmanga intun nun kan la tum mêk chu a nih hi. Zu tel lovin a hausak theih a, a hlim theih a, a hausak theih bawk. Kan thil tharte hi Zua siam kher lovin in tur tui takah a siam theih vek bawk. Kan ram leh hnam hian kan thatpui leh dampui tur chu Pathian tihna leh a thu pek zawm chauh hi a ni.
Khawvel ram zau zawkte kan thlir a, rual kan awt a, sum ngah a hausak te kan châk. |halaite hlimna te, khawvel thila changkânna leh hmasawnna te kan ngaihtuah hi a pawimawh lo chu a ni lo. Amaherawhchu kan ngaihpawimawh hmasak tur kan thlahthlam si chuan kan boralna tur lamlian kan sial zau ting a ni mai. Miin khawvel hi a pumin nei sela, inti boralin emaw intichhe si sela a tan enge sawt ang (Matthaia 16:26) tih ziak ang khan. Amah kan Lalpan ngaihpawimawh hmasak tur a tih chu ei leh in thu lam ni lovin ‘A lal ram leh a felna’ a ni. Tirhkoh Paula pawh khan “Pathian Lal Ram chu ei leh in lam thu a ni si lo va, felna te, remna te leh Thlarau Thianghlima lawmna te a ni zawk e. (Rome 14:17) tiin min hrilh.
‘I ram lo thleng rawh se’ tih thupui hmanga politics kheltute leh Kohhran inkhawm, pawl thiltih leh chhung inkhawma tawngtai thin te hian Zu nge kan duh PATHIAN LAL RAM tih hi thutlûkna fel tak kan siam a ngai ta. Pathian Lal Ram kan zawn hmasak a, tih nuam leh thuawih taka kan awm chuan kan rama thil tha kan la eiin kan la in dawn. Kan buaipui tur dik tak Pathian Lal Ram Sawrkar i buaipui tawh zawk ang u.