Nilai zan khan LPS Arena, Flakland-ah Zudio LPS Pro Fight 2024 khelh chhunzawm niin, quarter-final khelh a ni a. Inkhel hmuhnawm tak paruk a awm. Quarter-final inhnek kan hrut kual thuak thuak ang.
BANTAMWEIGHT
Sebastian VL Rinnunga (Ramthar Veng) bt Hmangaihenlaia (Ngengpuitlang)
(Unanimous Decision (29-28, 30-27, 29-28)
Kum 20 mi Rinnunga’n rahbi dang tuk belhin quarterfinal-a a inlan vawi khatnaah dertawng lovin Ngengpuitlang boxer Hmangaiha a hneh a, inrinni zan semifinal-ah Eric Lalthangkima (Darlawng) nen an intawng ang. Inringtawk takin Ramthar Veng tlangvalin a hmachhawn a, a pantuah tang hnemin a ngila a hnek zawn bakah a hnuai leh chungah hnek zawn telin a tibuai a, round hmasa berah Hmangaiha a inveng nasa a, a chhang let hneh lo. Boxer pahnih an chet ran loh avangin inhnek a nung tawk lo va, round hnihnaah Ngenpuitlang boxer a hma aia ngampain a hnek chhuak tam a, an inhnektawk viau laiin round hnuhnung berah Rinnunga’n tan hmun a siam tha a, langsar taka a hnek fuh zawn rualin thiamna nei zawk a ni tih a lantir a, nikum ang bawkin quarterfinal atangin Hmangaiha a tla.
MIDDLEWEIGHT
C Lalduhawma (Bethlehem Vengthlang) bt Vanlalbiakhlua (Thuampui Vengthar)
(Unanimous Decision (30-27, 30-27, 30-27)
2019 middleweight champion a nih hnua Pro Fight-a a tel leh hmasak berah Duhawma’n harsa lovin a hmabak a hlen zel a, Biakhlua lakah round tin la vekin inhnek a thunun. Kum 29 mi Duhawma’n a hnek hneh a, a tir lamah Thuampui Vengthar rawltharin beiseiawm takin hnek chhuak mah se an kutthlak a innat hleih a, chiang taka lehlam hnek a tawrh hnuah inveng chungin a tawlh kual a, hnek fuh ve fo mah se awmzia a nei tham lo. Bethlehem Vengthlang boxer-in chiang tak takin a taksa leh a hmaiah a hnek a, chutih rualin vawi hnih aia tam hnek zawn a harsat avangin tlu tur khawpin a nawr rei thei bik lo va, inrinni zanah thahrui nei leh nghet tha tak Seling boxer Zoremsiama nen final luh an inchuh dawn a ni.
LIGHTWEIGHT
C Lalhruaitluanga (Cherhlun) bt Israel Lalrinawma (Hunthar Veng)
(Split Decision (29-28, 29-28, 28-29)
Champion a tumna kawng zawh chhunzawmin Cherhlun tlangval Hruaia’n awlsam lo takin Rinawma a hneh a, a tir lamah che fuh tawk lo mah se round hnihna atangin tlak fual nei lovin 29-28, 29-28, 28-29-in a chak rual a, inrinni zan semifinal-ah Bungkawn boxer Vanlalnghaka nen an inhmachhawn ang. Kum 20 mi Rinawma nen fimkhur taka an khelh dun avangin round hnihna thlengin langsara inhnek fuh a tam lo a, hnek dik a hlu zual. Inlehthalna lian thlentir thei turin Hunthar Veng boxer-in round khatnaah fuh takin lehlam invenna a hnek tlang a, Hruaia kut chhuak karah tha takin a vai fuh tel bawk. Round hnihnaah kum 22 mi Hruaia’n hma a sawn hret a, a ban phak atanga a hnek zawn tam bakah lehlam taksaah a hnek tel a, Rinawma’n hnek fuh ve fo mah se a hma angin a inveng tha tawk lo. Round hnuhnung berah tawn hriat nei zawk Cherhlun boxer-in thahrui a neih that chhawrin a nawr hneh a, boxing inelna a tel hmasak berah Rinawma’n title fight-a inlan tawh lakah fiahna hautak a pal tlang zo ta lo a ni.
WELTERWEIGHT
Lallawmawma (Tuipui) bt Lalhriatrenga (Sihphir)
(Unanimous Decision (30-27, 30-27, 30-27)
National Games silver medal awrh tawh Lawma kawng a awlsam zel a, thiamna leh theihna kawng hrang hrangah Hriatrenga awpbet tluanin chiang takin semifinal a lut a, inrinni zan semifinal-ah rin hlawh ni chungin Chawnpui rawlthar Lalnunsanga hmaah a inlan zui leh dawn a ni. Pro Fight-a a tel hmasak berah amatuer boxing-a insawrbing thin Lawma’n a bitumte a hnek hneh thei viau a, Sihphir tlangval Hriatrenga’n tluk a pumpelh tih chauh lo chu chhuan tur a nei tam lo. Kum 22 mi Tuipui boxer-in a taksaah na thamin vawi eng emaw zat a hnek bakah a luah a hnek hnem hle bawk a, inthlau takin hun an hmang tluan.
FLYWEIGHT
Lalrinngheta (Tuipui) bt Biaklawmthanga (Khuangleng)
(Unanimous Decision (30-27, 30-27, 30-27)
2022 bantam champion Rinngheta’n thiamna hmangin tharum ngah Biaka a thunun a, tha taka inveng chungin dik leh rang tak takin a hnek a, chiang takin round tinah a chak. Nuam ti takin Tuipui boxer-in a khel a, Biaka’n panin ngawrh takin bei mah se hnek fuh a harsat tluan a, a inthlah dul laiin Rinngheta’n dik takin vawi khat aia tam a hnek thin bakah tawlh kual pahin rang takin a hnek fuh reng a, Khuangleng tlangval tan zir belh tur hnutchhiahsak chungin semifinal a lut. Weight hrang pahniha champion a tumna kawng erawh a awlsam zui dawn lo va, inrinni zanah Melthum beisei Emmanuel Vanlalthlengliana nen an inhmachhawn dawn a ni.
Emmanuel Vanlalthlengliana (Melthum) bt Benjamin Lalrindika (Selesih)
(Unanimous Decision (30-27, 30-27, 30-27)
Kum 22 mi Thlenga’n thla li chhunga a vawi hnih nan Benjamin Lalrindika a hneh rualin hma a sawn tih a lantir a, a tir lamah hnek tluin Pro Fight kal meka vawi thum a inlannaah knockout hmangin tum thum chak zawn thei ta lo mah se title cho phak a ni tih a chet danah a entir tel. July 26 khan LPS Fight Night-ah Melthum boxer-in a hmun ngaiah unanimous decision-in Selesih rawlthar a hneh tawh a, an intawn nawn lehnaah a hma aia chiangin judge pathumin 30-26 vekin an chaktir a ni. Minute khat bak an la innuai hman lo tihin Thlenga’n vawi thum a hnek zawn a, a ding lamin a bekah chiang takin a vai tlu. Kum 18 mi Rindika tho lehin a khelh dan pangngaiin ngampa takin a hnek zui zel a, hlawhtling thin mah se inven tel lamah harsatna a tawk. A hma aia nghet, kutthlak na leh rang Thlenga’n chiang tak takin a hnek a, inhnaih chilhah vawi hnih aia tam hnek fuh zawnin Rindika’n an tuar hnem a, mahse, tlu nawn lovin a ding tluan a ni.
GIG Motors Fighter of the Night
– Emmanuel Vanlalthlengliana (Melthum)
November 29 leh 30 zanah semifinal chhunzawm a ni dawn a, Title Fight thlengin round li zel an inhnek tawh ang. Semifinal-a chak lovin lawmman pawisa fai Rs 8,000 theuh an la ang a, a hmuna inhnek enna ticket Rs 100 a ni tawh dawn a ni.