Zudio LPS Pro Fight hmawrbawkna zaninah…
A hmun ngai LPS Arena, Falkland-ah boxer 286 telna Zudio LPS Pro Fight 2024 hmawr bawk a ni dawn a, Title Fight hi zanin dar 8-ah tan a ni ang.
Nimin zing khan LPS Auditorium, Zarkawtah Title Fight-a inlan tur boxer 10 inbukin khel thei turin an tling vek a ni.
Professional boxing chhinchhiahna boxrec-a ziahluh tura ruahmanna siam tawh chu tihdanglam a ni a, inhnek dang ang bawkin promotional boxing pangngai anga kal tlangpui a ni dawn.
WELTERWEIGHT
Lalruatzela Hauzel (Mission Veng, title holder) v Lallawmawma (Tuipui)
Lalruatzela Hauzel (Mission Veng, title holder) (kum 23, kg 66.9, height 5’6”, reach 5’6”)
“A khel ka hmu tawh a, a tha khawp mai. Mahse, min hneh turin a tha tawk lo tih ka hria. Kum tluanin ka inbuatsaih a, round li chauh kan inhnek dawn avangin a tlem ka ti a, ka taksa a inpeih hle a ni,”
Kum 2022 Pro Fight semifinal-ah Ruatzela a tla a, nikum khan title fight-ah Lalruatpuia (Saikhamakawn) hnehin a vawi khat nan Pro Fight welterweight-ah a champion. Professional boxing vawi li a khelh tawhah tum hnih chakin vawi hnih a tlawm a ni.
Lallawmawma (Tuipui)
(kum 22, kg 67, height 5’4”, reach 5’7”)
“A inkhel video atanga ka en atangin ka hneh ngei ka inring. Pro Fight a awm dawn tih ka hriat atangin coach tha tak hnuaiah ngawrh takin ka inbuatsaih a, a title ka chhuhsak ngei ka ring. Taksa lamah ka inpeih a, round khelh ngai zatah harsatna a awm lo ang.”
National Games silver medal hnek chhuak tawh Lawma hi Pro Fight-a a tel vawi khatna a ni a, title chuh tura a kalkawngah Manglianson, Lalhriatrenga, Lalnunsanga leh Zoremsanga a hneh a, GIG Fighter of the Night-ah vawi khat thlan a ni tawh. Inelna hrang hrangah Ruatzela nen an intawn vawi khatna tur a ni.
LIGHTWEIGHT
Lalkhawngaiha (Venghlui) v C. Lalhruaitluanga (Cherhlun)
Lalkhawngaiha (Venghlui)
(kum 18, kg 61, height 5’9”, reach 5’11”)
“Ka inpuahchahna a tha a, awlsam takin a che ngawt lo ang. Round laktir ka tum lo a, round li khel tur kan nih chuan ka la vek ang.
Pro Fight-a a tel hmasak berah Khawngaiha’n title a chuh nghal dawn a, Mizoram pum huap kum bithliahah inelnaah medal la tawhin seed pek a ni. Vawi thum chak zawn mekin Lalduhkima, Zonunzira leh Lalruatmawia a hneh.
C. Lalhruaitluanga (Cherhlun)
(kum 22, kg 60.8, height 5’9”, reach 6’)
“Kum tluanin Sete Boxing Academy-ah coach hnuaiah tha takin ka inbuatsaih a, taksa leh rilruah ka inpeih tawk. Ka tumpui tur pawh a tha a, chuti chungin ka hneh dan tur chu a hunah a lo lang mai ang. A hma thei ang bera zawh ka duh a, ka sawp viau ang.”
Kum 2023 title fight-ah HC Lalramfela a hneh lo a, champion lai hi welter-ah a insawn avangin a la tawn ngai loh Khawngaiha nen kawltu nei lova awm mek light champion kawnghren an inchuh dawn a ni.
FLYWEIGHT
Vanlalenkawltira (Dinthar Champhai) v Lalrinngheta (Tuipui)
Vanlalenkawltira (Dinthar Champhai)
(kum 22, kg 52, height 5’5”, reach 5’5”)
“Kum tluanin Alpha Gym-ah ka inpuahchah a, a tir atangin ka duh ang takin ka hnek chhuak thei ang. Kei aia hnek rang leh tuan tha zawk a nihna ka hre lo va, hemi kawngah hian kei aia tha ka hre lo. Tu pawh ka hmaah ding se ka phur a, ka inringtawk.”
Kum 2023 title fight-ah inhnial thei takin Enkawla’n NT Lalbiakkima a hneh lo va, champion lai hi tun tumah a tel theih loh avangin title a kalsan rochun tumin Enkawla’n hmabak pakhat hlen tur a nei. Rinngheta nen July 26 khan LPS Fight Night-ah intawng tawhin chak zawk awm lovin an inhnehtawk.
Lalrinngheta (Tuipui)
(kum 22, kg 52, height 5’6”, reach 5’9”)
“Zamna ka nei lo a, min hneh lo viau ang. Ruahmanna mumal tak neiin fly-ah ka khel a, he weight-ah hian champion nih ka duh a, taksa leh rilru lamah ka inpuahchah tha a, pal tlang ka harsa viau ang.
Kum 2022 khan bantamweight-ah Rinngheta a champion a, nikumah light-ah insawnin a thleng sang tawk lo. Kuminah fly-ah chona thar a hmachhawn leh a, Pro Fight chanchina vawi ruk champion thei awm chhun Biakkima kalsan champion kawnghren a rochun thei a nih chuan weight hrang pahnihah title a hnek chhuak dawn a ni.
MIDDLEWEIGHT
C. Lalhruaitluanga (Chawngtlai, title holder) v F. Lalthanliana Jr (Electric Veng Lunglei)
C. Lalhruaitluanga (Chawngtlai, title holder)
(kum 27, kg 74, height 5’8”, reach 5’9½”)
“Ka inbuatsaihna a tha a, ka title kawl mek hi min chhuhsak lo ang. A thatna ber hmanga hneh ngei ka chak hle a ni.
Kum 2022 khan welterweight-ah Hruaia a champion a, nikumah middle-ah insawnin title fight-ah Thanliana hnehin Pro Fight chanchina weight hrang pahniha champion thei zingah a inhlangkai. Mahse, November 30 khan Bangalore-ah WBC India title a chuh a, Ritesh Singh a hneh lo a ni.
F. Lalthanliana Jr (Electric Veng Lunglei)
(kum 24, kg 73.6, height 5’9”, reach 5’11”)
“Ka inpuahchahna a tha a, a tul chuan tharum emaw a tul dan danin title lak ngei ka tum. Ka chak chhohna kawngah tute pawh beih an harsa a, (2019 middleweight champion) C Lalduhawma kha a harsa ber. Champion kawnghren chhuhsak ngei ka duh a, hruihrual chhungah kan hria ang.”
Kum 2023 khan a vawi khat nan Pro Fight-ah Thanliana a tel a, title fight-ah Hruaia hneh lovin a tlawm. Kumin intawng nawn lehin title an inchuh leh dawn a, a khelh chhoh dan atangin nikuma a tlawmna chhan let a inbeisei sang hle a ni.
BANTAMWEIGHT
Laldinsanga (Ramthar Lunglei, title holder) v Omega Lalramdina
(Kulikawn)
Laldinsanga (Ramthar Lunglei,
title holder)
(kum 21, kg 56, height 5’5”, reach 5’6”)
“Boxing hi a hahthlak a, a rorum bawk a, tute emaw hnenah title pek mai mai chi a ni lo. Harsa takin Pro Fight champion ka ni thei a, kawl zel ka duh a ni. Omega (Lalramdina) hi a taima a, tun dinhmun a thleng hi ka lawmpui a, Sete Academy-ah inbuatsaih nan kan inhnek dun nasat avangin ka hre chiang a, huphurhawm tak a ni. Mahse, round li din tluantir loh hram erawh ka tum.”
Kum November 30 khan Bangalore-ah rahbi thar tukin Dinsanga’n WBC Youth bantam world title a la a, Pro Fight title humhim turin a inthlahdah phah dawn lo tih chiang takin a sawi. 2022 atangin Pro Fight-ah a tel a, flyweight-ah champion nghalin best boxer-a thlan a ni a, 2023-ah bantam-ah insawnin a champion leh a, best boxer-a thlan a ni leh.
Omega Lalramdina (Kulikawn)
(kum 22, kg 56, height 5’6”, reach 5’9”)
“Kum thum chhung hnathawk pahin boxing ka zir tawh a, ni tin hma ka sawn zel a, a title kawl lai ka laksak theih ka inring. Tun dinhmunah Mizorama tha ber a ni a, amah ka tum thei tur hi ka lawm a, ka phur tak zet. Inring rengin ka awm dawn a, ka theihtawp ka chhuah dawn.”
A vawikhatna’n title fight-ah Ramdina a inlan dawn a, nikum khan semi-final stage-ah a tla. Kuminah hma a sawn a, vawi li chak zawn mekin, a khelh dan hriatthiam har tak a nih avangin a tumpuite tan a buaithlak fo a, professional boxing bikah tum hnih inhnek tawhin a chak ve ve a ni.
Zanin hian LPS Youth Icon Top 5 J. Lalrosanga a zai dawn a; khuallian chu Zothantluanga, Zudio Store a ni ang.