Zungbuna lunghlu phum tam record siam
HK Designs leh Hari Krishna Exports chuan zungbun-ah lunghlu 50,907 phumin, Guinness World Record, zungbuna lunghlu phum hnem ber record an siam. Heng lunghlu an phum zawng zawng hi mihringin an kut ngeia an phum vek a ni. Zungbun hi thil hlui an hman nawn leh atanga an siam a ni a, rangkachak 18 carat hman tawh hnun leh customer ten an pek let lunghlu te an hmang a ni.
Mumbai-a hmunpui nei he firm dintu leh managing director ni bawk Ghanshyam Dholakia chuan, “Guinness World Records-in min hriatpui hi a lawmawm tak zet a, Hari Krishna Exports leh HK Designs-a kan team te thawhrimna leh inpekna puan chhuahna a ni. Kan kut themthiamna leh thawhrimna te hetianga phochhuah a ni thei hi kan inchhung ve viau a ni. Tlereuh sumdawnna lamah tiam chin awm lo va kal zel kan tum dawn a ni,” a ti.
He zungbun siam tura ngaihtuahna an sen atanga an siam zawh thleng hian thla kua vel zet hun an hmang a, a computer hmanga design nan ringawt pawh hian thla li vel an hmang niin an sawi.
He zungbun hi a hmingah Eutierria Ring an ti a, Dholakia chuan siamtu leh mihring inzawmna entirna tihna niin a hming awmzia hi a sawi. He zungbun hi nihawi par (sunflower) base a siam a ni a, a par hi inthuah-li (four layer) niin, lunghlu disc pahnih leh phengphehlep lem te a awm bawk. He zungbun siam nana an lunghlu hman zawng zawng hi International Gemological Institute-a lunghlu lama mithiam ten an endik vek chauh an hmang niin an sawi a, a zungbun rih zawng hi gram 460.55 niin, lunghlu hi 130.19 carat a ni.
He zungbun hi May ni 11 atanga ni 14 chhunga neih tur GenGeneve show-a Hari Krishna Exports Booth-ah an pho chhuak dawn a, June ni 2 atanga ni 5 thlenga neih tur JCK Las Vegas Show-ah HK Designs Booth-ah an pho chhuak bawk ang.
Zungbuna lunghlu phum tam record siam
