Rev. Dr. Zaichhâwna Hlâwndo
Zoram Thar, Zofate Lairelna Inpui leh Zoram Thar Branch USA te hmalaknain USA Zofate Unity Conference 2026 chu September 25–26, 2026 chhung khân Mizo Christian Church, 2901 E Banta Road, Indianapolis, Indiana, USA-ah buatsaih a ni.
He inkhâwmpui hmang tur hian Zoram Thar hruaitu Rev. Dr. Zaichhawna Hlawndo leh Ziaktu lian Nl. Lalruatfeli Hlawndo te an kal. He inkhawmpui buatsaihna chhan ber chu USA-a Zo hnahthlak Zofaten kan nihna dik tak hria a, kan hnam nihna dik tak hminga inpumkhatna tha kan neih theihna tur leh khawvel puma Zofate Lal Isua Krista tana kan inpumkhatna zelna tur a ni.
He programme atan hian sum hman tur awmsa a awm lova, Pathian intum chawpna “Jehovah Jire” hmanga buatsaih a ni. Sum mamawh zat hi Dollar 5,000 vel a ni. Pathianin a mite thinlungah hna thawkin USA-a Zofa mi inphalte hnen atangin thawhlawm kan dawng zel a. Ei leh in tur pawh San Asian Restaurant neitu, Pi San Cing in min siam sak a. Inkhawmpui hman nan kan mamawh kan dawn bakah pawisa hman ban dollar 1010 lai kan nei a. Zofate Pathian Biak Inpui thawhlawm atan pek a ni.
USA-a Zofate hian hnam hming anga hman hming hrang hrang Chin (Falam, Hakha), Zomi, Zophei, Mizo, Mara leh a dangte kan nei a. Tunah hian USA-ah Zofate hi nuaikhat dawn kan awm ve tawh a ni. Inkhawmpui nghahna Indianapolis-ah pawh hian kohhran lian tak tak, member 2000 chuang nei pawh an awm nual tawh a. Mahnia Biak in nei deuh vek an ni. Kum rei lo te chhunga Lalpan Zofate min chawikan dan hi a ropuiin a mak tih loh rual a ni lo.
September 25, Zirtâwpni zân dâr 7:00-ah programme chu hman tan a ni a. Mafeli Hlawndo leh Mawipuii-te host an ni. Worship team-ah guitar perhtu Vanza leh Elliot, bass perhtu Amos, drums vawtu Vanlian leh piano tumtu Peter-te an ni.
Indiana Mizo Upa Pawl Zaipawlin in inlawmna hla sa in hun an hawng. Zoram Thar hruaitu Rev. Dr. Zaichhawna Hlawndo lehkhabu ziah ‘Seventy Reflections on Christianity, Nationality and Politics’ chu Rev. Dr. Thla Awr Bawihrin – Zophei Baptist Church founder leh Senior pastor ni bawk chuan a tlangzarh.
Zofate zathiam tak tak – Christian Laldinthara, Rachel Hniang leh San Cing – ten hla mawi tak tak sain min awi a. Zofate inpumkhatna thuchah – Rev. Dr. Pau Khan Khai, ZBCA President, Syama Naw Eh Phaw, Counselor, FBCI, Elaisa Vahnie, MPA, BACI leh Dr. Rena Gainey, arise2LEAD founder ten an sawi. Group zai ngaihnawm tak tak Echoes of Grace, Zomi Choir leh Indiana MUP Choir te atangin kan ngaithla. BCBC Nubu leh CEBC Youth-te worship dance an nei a, mit an titlai hle. Ruahman lawk angin Inkhawmpui resource person Rev. Dr. Zaichhawna Hlawndo, President, Zoram Thar in Zofate nihna leh tobul chungchangte, Zofate ka inpumkhat a pawimawhna thute a sawi.
Inkhawmpui hun hnihna chu September 26, Inrinni zing dâr 10:00-ah neih leh a ni. Indiana Mizo Society of America Zaipawl-in inlawmna hla ‘Insuihkhawm leh zai i rel ang u’ tih hla an sa a. Zofate inpumkhatna thuchah ropui tak tak Rev. Dr. Hre Mang, Senior Pastor, FCCI, Rev. Vanlaldinga, Senior Pastor (Retd.), MCC, Rev. Dr. Thang Za Pau, MSM Founder leh Rev. Dr Hrang Hlei, CBCUSA Ziaktu Lian te hnen atangin ngaihthlak a ni a. Kan thusawitute hi USA Zofate zinga kan mi chhuanvawr tak tak te an ni.
Inrinni programme-ah hian zaithiam Sian Sian, Christian Laldinthara leh Nango Kithie-ten hla mawi tak tak sain min awi leh bawk. Rev. Dr. Zaichhawna Hlawndo, President, Zoram Thar in USA Zofate inpumkhatna atana hmathlir hrang hrang a sawi a. USA Zofate puala kût hman te, inkhawmpui chhunzawm zel te, thalai puala intaawhkhawn buatsaih te leh kohhran intlawh tawnna tur siam a pawimawh thute a sawi.
USA Zofate Inpumkhatna Inkhawmpui neih vawikhatna hi a nuam kan ti tlang a. Zo hnahthlak peng hrang hrang pawh kan kokim tha hle a. A bikin thalaiten hlawk thlak an ti a, hetiang programme hi zawngchhang thlak tak ni a an hriat thute pawh kan dawng. USA Kohhan hruaitu lu, mi pawimawh, hnam aiawh tur ang pawh kan kim tha a, Zofaten inpumkhatna rahbi thar, bung thar kan kai a ni tih a takin kan chang ho kha a hlu tak zet a ni. Kan hmabak pawh a eng hlein kan hria.