Parliament-a NDA sawrkar rintawk lohna motion putluha vote lak turah chief minister Zoramthanga chu official taka in an awn lam tichiang turin an phut tih Congress Thalai chuan an sawi.
Parliament Session neih meka sawrkar laka ‘No Confidence Motion’ putluha vote lak turah MNF sawrkar chu thlawp zawnga vote ve tura phutin Congress Thalai chuan chief minister chu a office-a lehkha pek tumin Nilaini khan CM Office an pan a, magistrate leh police duty-ten CM Office-a luh an phalsak loh avangin hun reilote chhung CMO gate bulah an innawr a, buaina liantham erawh a thleng zui lo.
Congress Thalai president Laltawnliana chuan Parliament Session-ah No Confidence Motion move mek a ni a. MNF-in hun a neih lai hian Mizoram MP-in BJP lamah vote lo turin an ngen tih a sawi. “An Hindu-pui ngeite pawhin Kristian-te min nghaisakna hi a lutuk e, an tih tawh lai a, Kristian MP-ten Kristian-te min nuai chimih vek duhtu BJP an la kawp reng hi kan ngaithiam thei lo a. BJP sawrkar rin lohna motion hi kan MP hian thlawp ngei turin kan ngen a ni,” a ti.Chief minister chu official-in BJP sawrkar a thlawp dawn lo tih thuchhuah tihchhuak turin an phut tih sawiin, “Tawngka ringawt chu kan awi tawh lo. I&PR minister Pu Lalruatkima’n BJP an thlawp loh tur thu a sawi mai mai ang hi chu kan pawm tawh lo. CAB chungchangah kan hre tawh, a do zawngin ka vote ang, titu kan MP khan Mizo mipui min nuihzat chungin CAB thlawp zawngin a vote leh si a, Mizo mipui min tizak lutuk; hetianga mipui min phatsanna ang hi thleng tawh lo se kan duh a ni,” Congress Thalai president hian a ti.
Magistrate duty-te ruahman angin, CM Office gate pawnah Congress Thalai duhdan angin lehkha hi CM private secretary Lalhmansanga hnenah an thehlut a. ‘Parliament Session neih mek a, Manipur-a thil thleng chungchanga opposition party tangrualin No Confidence Motion an putluh hi Mizoram sawrkar hian a thlawp loang tih kan hlau a. Forest Amendment Act 2023 min pass pui maite kha na kan ti takzet a. Chuvangin tuna Parliament Session-a No Confidence Motion putluh hi Mizoram sawrkar hian a thlawp tur zia Mizo mipui hmaa official-a puang turin kan phut a ni,’ tiin an thlen a ni.
An awn lam official-a tichiang turin CM phut
