Daily Newspaper

“… An bei ang che, mahse an hneh lo ang che…”

19

Jeremia lehkhabu-ah khan “… an bei ang chia, mahse an hneh lo ang che…” tih a awm a, MLA Lalduhoma an bei ang a, mahse an hneh dawn lo tihna nia ngai, chutianga hmehbel chu an awm.

Chutianga hmehbel theih tur chuan thil a kal ve bawk a, Inrinni vel khan Serchhip bialtu Lalduhoma hian a whatsapp status-ah he Bible chang hi a hmang; chu chu social media lamah pawh a darh.

“Ka thinlungah a lang tlat a ni. Chu bak han sawi tur vak pawh a awm lo,” amah chuan a ti a, tuna a dinhmun nen inmil a tih vanga he Bible chang hi ngaihtuah a ni em tih pawh, “Tun dinhmuna ka awm laia lo lang chu a ni alawm,” tiin a sawi fiah.

Duhoma hi MLA 12 te’n dan bawhchhia-ah puhin ban turin speaker hnen an ngen a, assembly secretariat lamin hei hi an bawhzui mek. Insawifiah tura tih a ni a, chumi zawhah a chungthu hi ngaihtuah a ni dawn a ni.

A thinlunga Bible chang lo langah “… mahse an hneh lo ang che,” tih a awm a, chu chu eng tihna nge tih pawh a hriatthiam bik loh thu a sawi. A insawifiah ang a, an ban dawn lo tihna nge, an ban ang a, a tling leh dawn tihna nge; amah chuan, “Ka hre bik lo… general election tihna te pawh a ni thei a, by-election te pawh a ni thei a, court te pawh a ni thei ang a… Engtihna nge ni dawn ni?” tiin nui chungin a sawi.

He a whatsapp status vang hian message a dawng hnem tih a sawi a, a lo hmute’n tuna a dinhmun nen an hmehbel tih sawiin, an lo tawngtaipui thu te, a lama an tan thu te an hrilh sup sup niin a sawi. “Ka chhang seng lo a, an vui ang tih a hlauhawm zawk,” a ti.

Speaker-in dan bawhchhiaa puh a nihna sawifiah tura a tihna a la chhan loh thu sawiin Duhoma chuan, “Ka la chhang lo a, hun a la awm alawm ka ti,” a ti. October ni 8 thleng insawifiahna hun hi pek a ni.

(THE AIZAWL POST – Tualchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy